ახალციხეში მშენებარე კორპუსში სამუშაოები მარტის ბოლოდან განახლდება

მშენებელი კომპანია „ზიმო“ სამუშაოებს 9 აპრილის ქუჩაზე უახლოეს დღეებში განაახლებს. ამის შესახებ „სამხრეთის კარიბჭესთან“ სამშენებლო სამუშაოების ხელმძღვანელი ბეჟან ბოჭორიშვილი აცხადებს.

„მარტის ბოლომდე სამუშაოები განახლდება და დაახლოებით, ორ თვეში დავასრულებთ კიდეც. ველოდებით, რომ კიდევ უფრო მეტად დათბეს. არ გვინდა, რომ ამინდის გამო ისევ შევფერხდეთ“, – ამბობს ბოჭორიშვილი.

შეგახსენებთ, რომ აქ ბინის ჩაბარებას 100–ზე მეტი ადამიანი ელოდება.

კორპუსის მშენებლობა ახალციხეში შინაგან საქმეთა სამინისტრომ 2012 წლის ივლისში დაიწყო. 108 –ბინიან შენობაში უწყებების თანამშრომლებზე 103 გადანაწილდა. მათთან იპოთეკური სესხის ხელშეკრულებები გაფორმდა და თითო თვეში 220 დოლარს იხდის. შენობა, რომელსაც შინაგან საქმეთა და იუსტიციის სამინისტროები მათივე უწყებების თანამშრომლებისთვის აშენებენ, ხელშეკრულების პირობების თანახმად 2014 წლის 30 ივნისს უნდა დასრულებულიყო.

კომპანიის დირექტორის ზურაბ კიკნაძის განცხადებით კორპუსი ძალოვნებს 2017 წლის ზაფხულში ჩაბარდებათ.


[თამუნა უჩიძე, ახალციხე]