მშენებელი: ‘ძალოვანების კორპუსის მშენებლობა 10 აგვისტომდე დასრულდება’

„დათქმულ ვადაში ვეტეოდით და ახლა ყველაფერი მორჩენილი იქნებოდა, მაგრამ თბილისიდან მოვიდა ბრძანება, რომ კორპუსების ფასადები სამი წლის განმავლობაში გახუნდა და ხელახლა შეღებვა სჭირდებაო. სამღებრო სამუშაოებს კი ერთი კვირა დასჭირდება“, – ამბობს შპს „ზიმოს“ სამუშაოების მწარმოებელი კახა მოდებაძე.

მისი თქმით, ამ დროისთვის ასევე დარჩენილია კორპუსში შესასვლელი კიბეების მოწყობა: "საკანალიზაციო და წყლის სისტემებსაც ცენტრალურ მაგისტრალზე მალევე დავაერთებთ. ამ ყველაფერს 10 აგვისტომდე დავასრულებთ და ბინებს მესაკუთრეებს ჩავაბარებთ“.

შეგახსენებთ, რომ ცხრა აპრილის ქუჩაზე კორპუსის მშენებლობა 2014 წელს შეჩერდა და სამუშაოები ოთხი თვის წინ განახლდა.

მრავალსართულიანი კორპუსის მშენებლობა ახალციხეში შინაგან საქმეთა სამინისტრომ და იუსტიციის სამინისტრომ 2012 წლის ივლისში წამოიწყეს. 108 ბინიდან 103 ამ უწყებების თანამშრომლებზე გადანაწილდა. მათთან იპოთეკური სესხის ხელშეკრულებები გაფორმდა და თითოული მათგანი თვეში 220 დოლარს იხდის.

სამინისტროებსა და შპს „ზიმოს“ შორის ხელშეკრულება 2012 წლის 5 ივლისს გაფორმდა. პროექტის ღირებულებამ 6 480 000 ლარი შეადგინა. მშენებლობა 2014 წლის დეკემბერში უნდა დასრულებულიყო, თუმცა, ბინები მესაკუთრეებს ამ დრომდე არ ჩაბარებიათ.

[ავთო ინასარიძე, ახალციხე]