მშენებელი: „ძალოვნებს ახალციხეში მშენებარე კორპუსი ზაფხულში ჩაბარდებათ“

ამის შესახებ ‘სამხრეთის კარიბჭესთან’ მშენებელი კომპანია „ზიმოს“დირექტორი ზურაბ კიკნაძე აცხადებს.

იგი შეკითხვაზე, დაფარა თუ არა შინაგან საქმეთა სამინისტრომ დავალიანება, რის გამოც წლების განმავლობაში კორპუსის მშენებლობა ფერხდებოდა, გვპასუხობს: „ჩემსა და შინაგან საქმეთა სამინისტროს შორის, ასევე ჩემსა და იუსტიციის სამინისტროს შორის, ყველა საკითხი გაკრვეული და შეთანხმებულია“.

მისი თქმით, როგორც კი კლიმატური პირობები მათ მუშაობის საშუალებას მისცემს, მშენებლობას დაასრულებენ: „გასაკეთებელი მხოლოდ ფასადი დარჩა. ახლა რომ შევუდგეთ მუშაობას ჩამოიყრება, ამიტომ გაზაფხულს ველოდებით. სამუშაოებს მალე დავასრულებთ და ძალოვნებს ახალციხეში მშენებარე კოპრუსი ზაფხულში ჩაბარდებათ“.

ახალციხეში, 9 აპრილის ქუჩაზე, 108–ბინიანი კორპუსის მშენებლობას ათობით ადამიანი ელოდება. მათ ნაწილს ბინის დასრულების მოლოდინში ცხოვრება ქირით უხდება.

როგორც კომპანია „ზიმოს“ სამუშაოების ხელმძღვანელი ბეჟან ბოჭორიშვილი ამბობს ამ დროისთვის აქ გასასხვისებელი მხოლოდ ერთი ბინა დარჩა: „შინაგან საქმეთა სამინისტრომ კი როგორც ვიცი დავალიანება რაც ჰქონდა უკვე დაფარა“.

შეგახსენებთ, კორპუსის მშენებლობა ახალციხეში შინაგან საქმეთა სამინისტრომ 2012 წლის ივლისში დაიწყო. 108 –ბინიან შენობაში უწყებების თანამშრომლებზე 103 გადანაწილდა. მათთან იპოთეკური სესხის ხელშეკრულებები გაფორმდა და თითო თვეში 220 დოლარს იხდის. შენობა, რომელსაც შინაგან საქმეთა და იუსტიციის სამინისტროები მათივე უწყებების თანამშრომლებისთვის აშენებენ, ხელშეკრულების პირობების თანახმად 2014 წლის 30 ივნისს უნდა დასრულებულიყო.

[თამუნა უჩიძე, ახალციხე]