შსს–ს ახალციხეში მშენებარე კორპუსის დავალიანება ჯერ კიდევ არ დაუფარავს

ახალციხეში, 9 აპრილის ქუჩაზე, 108–ბინიანი კორპუსის მშენებელი ფირმა „ზიმო“ დამკვეთისგან, შინაგან საქმეთა სამინისტროსგან დავალიანების დაფარვას მეორე წელია ელოდება.

როგორც კომპანია „ზიმოს“ სამუშაოების ხელმძღვანელი ბეჟან ბოჭორიშვილი ამბობს, ბოლო ხუთი თვის განმავლობაში, შინაგან საქმეთა სამინისტრომ დავალიანების ნაწილი დაფარა: „ზუსტად არ ვიცი რა ნაწილი გადმორიცხა, თუმცა 20 ათას დოლარამდე დავალიანება ჯერ კიდევ რჩება“.

მისი თქმით, პრობლემას ქმნის ისიც, რომ სამინისტროს მშენებარე კორპუსში ერთი ბინა გასაყიდი დარჩა.

ბოჭორიშვილი იმედოვნებს, რომ სამინისტრო დავალიანებას ახალ წლამდე დაფარავს, თუმცა გაზაფხულამდე აქ სამუშაოების დასრულება ძლიერი ყინვის გამო შეუძლებელი იქნება: „ყინვაში რომ გააკეთო გაფუჭდება და მაინც ხელმეორედ გასაკეთებელი იქნება“.

მისი თქმით, შინაგან საქმეთა სამინისტროს, გარდა ახალციხეში მშენებარე კორპუსისა, სხვა დავალიანებებიც აქვს დასაფარი: „მაგალითად, ანაკლიაში 600 000 ლარი დარჩათ გადასახდელი“.

შინაგან საქმეთა სამინისტროს „სამხრეთის კარიბჭემ“ აღნიშნული დავალიანების შესახებ 2016 წლის 18 მარტს წერილობით მიმართა. თუმცა პასუხი ამ დრომდე არ მიგვიღია.

სამინისტროს საჯარო ინფორმაციის გაცემის ბიუროში 31 მაისს გვითხრეს, რომ „ეს კითხვები გადაგზავნილია ეკონომიკურ დეპარტამენტში და პასუხი ჯერ მიღებული არ ჰქონდათ“.

ამჯერად შსს–ს საჯარო ინფორმაციის გაცემის ბიუროდან კანცელარიაში გადაგვამისამართეს, თუმცა აქ „სამხრეთის კარიბჭეს“ სატელეფონო ზარებს არ უაპასუხეს.

შეგახსენებთ, კორპუსის მშენებლობა ახალციხეში შინაგან საქმეთა სამინისტრომ 2012 წლის ივლისში დაიწყო. 108 –ბინიან შენობაში უწყებების თანამშრომლებზე 103 გადანაწილდა. მათთან იპოთეკური სესხის ხელშეკრულებები გაფორმდა და თითო თვეში 220 დოლარს იხდის. შენობა, რომელსაც შინაგან საქმეთა და იუსტიციის სამინისტროები მათივე უწყებების თანამშრომლებისთვის აშენებენ, ხელშეკრულების პირობების თანახმად 2014 წლის 30 ივნისს უნდა დასრულებულიყო.



[თამუნა უჩიძე, ახალციხე]