ახალციხის მერი მშენებარე კორპუსზე: ‘მშენებელი თანხის ჩარიცხვას ელოდება’

ახალციხის მუნიციპალიტეტის მერი ზაზა მელიქიძე აცხადებს, რომ მას ახალციხეში, 9 აპრილის ქუჩაზე იმ კორპუსის მშენებელთან, რომლის ჩაბარებასაც 108 ოჯახი, მეოთხე წელია უშედეგოდ ელოდება, ხშირი კომუნიკაცია აქვს: „ამ კორპუსის საკითხი მტკივნეული თემაა, ბევრი ადამიანი ამ ბინის სესხთან ერთად ქირის ფულსაც იხდის. ეს საკითხი სიღმისეულად შევისწავლეთ, ხელშეკრულებებიც დეტალურად გავიარეთ“.

მისი თქმით, მშენებელი თანხის ჩარიცხვას ელოდება, თუმცა რომელი დამკვეთისგან, იუსტიციის სამინისტროდან თუ შინაგან საქმეთა სამინისტროდან, მელიქიძე არ აკონკრეტებს: „არ ვიცი ვისგან არის გადასარიცხი თანხა, ვფიქრობ, რომ არის რაღაც დეტალები და ვერ ვიხედებით ჯერ კარგად შიგნით რა ხდება“.

შეკითხვაზე, თუ ჰქონდა მას კომუნიკაცია რომელიმე სამინისტროსთან კორპუსის მშენებლობის დასრულებასთან დაკავშირებით, გვპასუხობს: „გვქონდა საუბრები, დეტალებზე ამ წუთში არ გვინდა საუბარი, რადგან ეს ყველაფერი გარკვეულ პროცესებს გადის“.
შეგახსნებთ, რომ მშენებარე კორპუსთან დაკავშირებით, ახალციხის მერს ადგილობრივები გასული წლის დეკემბერში შეხვდნენ. მათ მუნიციპალიტეტის პირველ პირს დახმარება სთხოვეს.

ასევე, შეგახსენებთ, კორპუსის მშენებლობა ახალციხეში შინაგან საქმეთა სამინისტრომ და იუსტიციის სამინისტრომ 2012 წლის ივლისში დაიწყო. 108 –ბინიან შენობაში უწყებების თანამშრომლებზე 103 გადანაწილდა. მათთან იპოთეკური სესხის ხელშეკრულებები გაფორმდა და თითო თვეში 220 დოლარს იხდის.

სამინისტროებსა და შპს „ზიმოს“ შორის ხელშეკრულება 2012 წლის 5 ივლისს გაფორმდა. პროექტის ღირებულებამ 6 480 000 ლარი შეადგინა. მშენებლობა 2014 წლის დეკემბერში უნდა დასრულებულიყო, თუმცა ბინები მესაკუთრეებს ამ დრომდე არ ჩაბარებიათ.

[თამუნა უჩიძე, ახალციხე]