ძალოვანი უწყებების თანამშრომლები ბინების ჩაბარებას ითხოვენ

შინაგან საქმეთა სამინისტროს თანამშრომლები, რომლებიც ახალციხეში მშენებარე კორპუსში ბინების ჩაბარებას უკვე მეოთხე წელია უშედეგოდ ელიან, აქ სამუშაოების დასრულებასა და ბინების გადაცემას ითხოვენ.

მათ იმის გამო, რომ სამსახურის დაკარგვის ეშინიათ, ვინაობის გამჟღავნება არ სურთ: „გვეშინია, ხმას ვერ ვიღებთ, ბინებთან ერთად შეიძლება სამსახურებიც დავკარგოთ და ოჯახები მშიერი დაგვრჩეს. არ გვინდა პრობლემები შეგვექმნას“.

ერთ–ერთი მათგანი, რომელიც „სამხრეთის კარიბჭეს“ ამ საკითხზე ესაუბრა, ამბობს რომ სესხის რესტრუქტურიზაცია გააკეთა, რადგან თავიდანვე გათვალისწინებულ 220 დოლარს ყოველთვიურად ვერ იხდიდა: „მე სოფელში სახლი მაქვს, იქიდან დავდივარ სამსახურში, ოჯახის გადმოყვანა მინდა ახალციხეში და ველოდები როდის ჩაგვბარდება, მაგრამ მე ბინა მაინც მაქვს, ბევრი ქირით ცხოვრობს და ქირასთან ერთად ამ მშენებარე ბინის სესხსაც იხდის“.

მისი თქმით, სხვა ქვეყნებში ჯარისკაცებს, პოლიციელებსა და მსგავს უწყებებში დასაქმებულებს სახელმწიფო ბინებს ჩუქნის, მათ კი საკუთარს არ უფორმებენ: „სულ რამდენიმე დღის სამუშაოა დარჩენილი, მაგრამ, როგორც ჩანს, დასრულებას არ აპირებენ. უკვე იმედიც აღარ გვაქვს, რომ მაგ ბინებს ჩაგვაბარებენ".

მშენებელ კომპანიაში „სამხრეთის კარიბჭეს“ ზარებს აღარ პასუხობენ, ამ საკითხზე არც შინაგან საქმეთა სამინსიტროსა და იუსტიციის სამინისტროში აკეთებენ კომენტარს.

შეგახსენებთ, კორპუსის მშენებლობა ახალციხეში შინაგან საქმეთა სამინისტრომ 2012 წლის ივლისში დაიწყო. 108–ბინიან შენობაში უწყებების თანამშრომლებზე 103 გადანაწილდა. მათთან იპოთეკური სესხის ხელშეკრულებები გაფორმდა და თითო თვეში 220 დოლარს იხდის.

სამინისტროებსა და შპს „ზიმოს“ შორის ხელშეკრულება 2012 წლის 5 ივლისს გაფორმდა. პროექტის ღირებულება 6 480 000 ლარი შეადგინა.

[თამუნა უჩიძე, ახალციხე]