მშენებელი: „ძალოვნების კორპუსში მშენებლობას მომავალი კვირიდან დავიწყებთ“

მშენებელი კომპანია „ზიმო“ ახალციხეში 9 აპრილის ქუჩაზე მშენებარე კორპუსში სამუშაოებს მომავალი კვირიდან განაახლებს. ამის შესახებ კომპანიის დირექტორი ზურაბ კიკნაძე „სამხრეთის კარიბჭესთან“ სატელეფონო საუბარში აცხადებს.

„სამშაბათიდან საქართველოში ვიქნები და დავიწყებთ. ამ დროისთვის შინაგან საქმეთა სამინისტროსაც და იუსტიციის სამინისტროსაც, ვფიქრობ, მემორანდუმი ჩვენთან სამუშაოების გაგრძელებაზე გაფორმებული ექნებათ“, – ამბობს კიკნაძე.

მისი თქმით, იმის გამო რომ კორპუსის მშენებლობის ვადა გასულია, გასაგრძელებად იურიდიული თვალსაზრისით დოკუმენტები ხელახლა მოსაგვარებელია და მიზეზი, რის გამოც გაზაფხულიდან აქ მუშაობა არ დაიწყო, სწორედ ეს იყო.

შეგახსენებთ, კორპუსის მშენებლობა ახალციხეში შინაგან საქმეთა სამინისტრომ 2012 წლის ივლისში დაიწყო. 108 –ბინიან შენობაში უწყებების თანამშრომლებზე 103 გადანაწილდა. მათთან იპოთეკური სესხის ხელშეკრულებები გაფორმდა და თითო თვეში 220 დოლარს იხდის. შენობა, რომელსაც შინაგან საქმეთა და იუსტიციის სამინისტროები მათივე უწყებების თანამშრომლებისთვის აშენებენ, ხელშეკრულების პირობების თანახმად 2014 წლის 30 ივნისს უნდა დასრულებულიყო.

[თამუნა უჩიძე, ახალციხე]