დაუსრულებელი მშენებლობა – შსს მშენებარე კორპუსის დავალიანებას არ ფარავს

ახალციხეში, 9 აპრილის ქუჩაზე, 108–ბინიანი კორპუსის მშენებელი ფირმა „ზიმოსთვის“ შინაგან საქმეთა სამინისტროს დავალიანება ამ დრომდე არ დაუფარავს.

„ყოველდღე გვპირდებიან, მაგრამ არ ფარავენ. ჯერ კიდევ არ ჩაურიცხავთ“, – ამბობს კომპანია „ზიმოს“ სამუშაოების ხელმძღვანელი ბეჟან ბოჭორიშვილი.

მისი თქმით, ვიდრე დავალიანება არ ჩაირიცხება, სამშენებლო სამუშაოები ვერ გაგრძელდება: „მათ ძველი დავალიანებებიც აქვთ. გარდა ამისა 5 ბინა გასასხვისებელია, ვიდრე სამინისტრო მათ არ გაყიდის, ხელისშემშლელი ესეც იქნება“.

შინაგან საქმეთა სამინისტროდან დავალიანების დაფარვის, მშენებლობის დასრულებისა და კორპუსთან დაკავშირებულ სხვა საკითხებზე პასუხებს „სამხრეთის კარიბჭე“ ორ თვეზე მეტია ელოდება. რედაქციამ კითხვებზე პასუხი წერილობით უწყებიდან 18 მარტს გამოითხოვა.
„ეს კითხვები გადაგზავნილი გვაქვს ეკონომიკურ დეპარტამენტში და პასუხი ჯერ არ მიგვიღია“, – გვითხრეს შინაგან საქმეთა სამინისტროს საჯარო ინფორმაციის გაცემის ბიუროში.

შეგახსენებთ, კორპუსის მშენებლობა ახალციხეში შინაგან საქმეთა სამინისტრომ 2012 წლის ივლისში დაიწყო. 108 –ბინიან შენობაში უწყებების თანამშრომლებზე 103 გადანაწილდა. მათთან იპოთეკური სესხის ხელშეკრულებები გაფორმდა და თითო თვეში 220 დოლარს იხდის. შენობა, რომელსაც შინაგან საქმეთა და იუსტიციის სამინისტროები მათივე უწყებების თანამშრომლებისთვის აშენებენ, ხელშეკრულების პირობების თანახმად 2014 წლის 30 ივნისს უნდა დასრულებულიყო.

[თამუნა უჩიძე, ახალციხე]