60 წლის ქალს, რომელზეც სავარაუდოდ ძალადობენ, თავშესაფარში გადაიყვანენ

სოციალური სამსახურების სააგენტოში „სამხრეთის კარიბჭეს“ განუცხადეს, რომ 60 წლის ქალს, რომელზეც ოჯახში, სავარაუდოდ ძალადობენ, თავშესაფარში გადაიყვანენ.

„სოციალურმა სამსახურმა რეგიონიდან მოთხოვნა გამოგვიგზავნა, რომ ეს ქალი თავშესაფარში გადავიყვანოთ. მაგრამ იმ დოკუმენტებს, რომლებიც საჭიროა მოქალაქის თავშესაფარში გადასაყვანად, ფორმა ასი აკლია“, – ამბობს სოციალური მომსახურების სააგენტოს საზოგადოებასთან ურთიერთობის სამსახურის წარმომადგენელი ტატა გამყრელიძე.

მისი თქმით, სააგენტომ აღნიშნული დოკუმენტის გაგზავნა იმ ოჯახს სთხოვა, რომელშიც 60 წლის ქალი ამ დრომდე ცხოვრობს: სამწუხაროდ, ჯერ არ გამოუგზავნიათ. ეს ფორმა ასი უბნის ექიმს უნდა დააწერინონ. თუ ეს დროში გაიწელა, მაშინ ამ კუთხით გამგეობის ჩართვა მოგვიწევს“.

სოციალურ სამსახურში გვიხსნიან, რომ 60 წლის ქალს ფორმა ასის მიღების შემდეგ ისეთ თავშესაფარში გადაიყვანენ, სადაც მას საჭიროების შესაბამისად მიხედავენ: „ამ ქალს ფსიქიკური პრობლემები აქვს და ამიტომ სპეციალური მომვლელი დასჭირდება“.

მას შემდეგ, რაც სოფელ სვირში ხანდაზმულ ქალზე ძალადობის საქმეში სოციალური სამსახური, „ახალგაზრდა იურისტთა ასოციაცია“ და სახალხო დამცველის აპარატი ჩაერთო, ხუთი თვე გავიდა. თუმცა, ამ დრომდე 60 წლის ქალი, ისევ იმ ოჯახში რჩება, რომლის წევრებსაც მეზობლები და სოფლის რწმუნებული ძალადობაში ამხელდნენ.

„ახალგაზრდა იურისტთა ასოციაციაში აცხადებენ, რომ მის მონახულებას მომავალ კვირას გეგმავენ. სახალხო დამცველის აპარატიდან კი „სამხრეთის კარიბჭე“ პასუხს ამ დრომდე ელოდება.

შეგახსენებთ, სოფელ სვირში მცხოვრები 60 წლის ქალის შესახებ „სამხრეთის კარიბჭემ“ მასალა 21 ივლისს მოამზადა. სოფელში ამბობენ, რომ უმწეო ქალს მისი რძალი გამუდმებით სცემს, მთელი დღე ქალი ნახევრად შიშველი აივანზე დახოხავს. სახლიდან კი გამუდმებით ყვირილისა და ტირილის ხმა ისმის.

[თამუნა უჩიძე, ახალციხე]