სოფელ სვირში, ქალი რომელზეც, სავარაუდოდ ძალადობდნენ, გარდაიცვალა

ქალი, როგორც მისი ოჯახის წევრები აცხადებენ, ფილტვის სიმსივნით გარდაიცვალა.

„სამი თვის წინ საავადმყოფოში გვეწვინა, იქ დაუდგინეს რომ კიბო ჰქონდა, ცალი ფილტვი სულ დამწვარი აქვსო გვითხრეს, მეორე კი ნახევრად ჯანმრთელი ჰქონდა“, – გვიხსნის გარდაცვლილის რძალი.

მისი თქმით, ბოლო დღეებში მას უკვე ჭამაც აღარ შეეძლო: „მხოლოდ მაწონს თუ მივცემდით, იმის ჭამაც უჭირდა“.

შეგახსენებთ, რომ 62 წლის ქალზე განხორციელებული შესაძლო ძალადობის შესახებ, „სამხრეთის კარიბჭემ“ მასალა 2016 წლის 21 ივლისს გამოაქვეყნა. აღნიშნული სტატიის საფუძველზე შინაგან საქმეთა სამინისტრომ ძიება სისხლის სამართლის კოდექსის 126–ე მუხლით დაიწყო.

როგორც სამცხე–ჯავახეთის საოლქო პროკურატურის განყოფილების უფროსი პეტრე მანველიშვილი ამბობს, „აღნიშნული სისხლის სამართლის საქმეზე ჩატარებულია არა ერთი საგამოძიებო მოქმედება, თუმცა რ.შ–ს მიმართ ძალადობა არ დასტურდება. მიუხედავად ამისა, საგამოძიებო ღონისძიებები ისევ გრძელდება“.

მასალის გამოქვეყენების შემდეგ საქმეში სოციალური სამსახური, სახალხო დამცველის აპარატი და „ახალგაზრდა იურისტთა ასოციაცია“ ჩაერთო. როგორც საჯარო, ასევე სხვა უწყებებიც განიხილავდნენ იმას, რომ სავარაუდო ძალადობის მსხვერპლი, ოჯახიდან თავშესაფარში უნდა გადაეყვანათ. ამის შესახებ გადაწეყვეტილება მიიღო სოციალურმა სამსახურმაც, თუმცა 62 წლის ქალი ისე გარდაიცვალა, რომ მისი ოჯახიდან გაყვანა ვერ მოხერხდა.

[თამუნა უჩიძე, ახალციხე]