შსს–მ სვირში, 60 წლის ქალზე შესაძლო ძალადობის ფაქტზე ძიება დაიწყო

საქართველოს შინაგან საქმეთა სამინისტროს ინფორმაციით, ძიება „სამხრეთის კარიბჭეში“ გამოქვეყნებული მასალის შემდეგ დაიწყეს.

უწყებაში აცხადებენ, რომ გამოძიება სისხლის სამართლის კოდექსის 126–ე პრიმა მუხლით მიმდინარეობს, რაც გულისხმობს სისტემატურ ცემას ან სხვაგვარ ძალადობას, რამაც დაზარალებულის ფიზიკური ან ფსიქიკური ტანჯვა გამოიწვია. ისჯება თავისუფლების შეზღუდვით ვადით ორ წლამდე ან თავისუფლების აღკვეთით ვადით ერთიდან სამ წლამდე.

შეგახსენებთ, სოფელ სვირში მცხოვრები 60 წლის ქალის შესახებ „სამხრეთის კარიბჭემ“ მასალა გუშინ მოამზადა. სოფელში ამბობენ, რომ უმწეო ქალს მისი რძალი სცემს, მთელი დღე ქალი ნახევრად შიშველი აივანზე დახოხავს. სახლიდან კი გამუდმებით ყვირილისა და ტირილის ხმა ისმის.

საქმის შესწავლა უკვე დაიწყო სახალხო დამცველის აპარატმა. უწყებაში ამბობენ, რომ საქმეში ყველა საჭირო მხარეს ჩართავენ. ოჯახში გუშინვე მივიდა სოციალური მომსახურების სააგენტო. სააგენტოში ამბობენ, რომ ქალს სხვა სახლში გადაიყვანენ, მუშაობენ მისთვის ე.წ. მხარდამჭერის დანიშვნაზე.

სოფელ სვირში ასვლას გეგმავენ ახალციხის მუნიციპალიტეტის გამგეობის ჯანმრთელობის დაცვისა და სოციალური უზრუნველყოფის განყოფილების თანამშრომლები. გამგეობაში ამბობენ, რომ ეს ამბავი არ იცოდნენ და "სამხრეთის კარიბჭესგან" შეიტყვეს. მიუხედავად იმისა, რომ გამგებლის წარმომადგენელი ამბობს, რომ ფაქის შესახებ იცოდა და ოჯახი გააფრთხილა კიდეც "ხელი არ დაეკარებინათ". გამგებლის წარმომადგენელი ფიქრობს, რომ ამ ამბის გამგეობაში მიტანა საჭირო არ იყო.

[ვარლამ წიკლაური, ახალციხე]