სოციალური სამსახური: სვირში მცხოვრებ ქალს სხვა ოჯახში გადაიყვანენ

„სამხრეთის კარიბჭეს“ მიერ გავრცელებული ინფორმაციის შემდეგ, სოფელ სვირში ვითარებაში გასარკვევად სოციალური მომსახურების სააგენტოს სამცხე–ჯავახეთის სამხარეო ცენტრის სოციალური აგენტები ავიდნენ.

„ჩვენმა თანამშრომლებმა საჭიროება დაინახეს, რომ ნამდვილად გამოსაყვანია ქალბატონი ოჯახიდან, რადგან კარგად არ ექცეოდნენ. ჩვენი კომპეტანციაა რომ ვუშველოთ და გადავიყვანოთ სხვა ოჯახში, რათა ჰქონდეს ნორმალური პირობები“, – აცხადებენ სააგენტოში.

მათივე ინფრიმაციით, 60 წლის ქალის დახმარების სურვილი ნათესავმა გამოთქვა. იგი ქალს საკუთარ სახლში წაიყვანს, თუმცა მანამდე ნებართვისთვის გარკვეული პროცედურებია ჩასატარებელი.

„ამ ქალს, მიუხედავად იმისა, რომ სპეციალური საჭიროების მქონეა, სტატუსი არ აქვს. ახალი კანონმდებლობით, ენიშნება მხარდამჭერი. ერთ–ერთმა ნათესავმა გამოთქვა მზადყოფნა, რომ ქალი თავისთან გადაიყვანოს. მხარდამჭერს სასამართლო ნიშნავს, ამ თემაზე უკვე დაწყებულია მუშაობა“, – აცხადებენ სოციალური მომსახურების სააგენტოში.

შეგახსენებთ, სოფელ სვირში მცხოვრები 60 წლის ქალის შესახებ „სამხრეთის კარიბჭემ“ მასალა გუშინ მოამზადა. სოფელში ამბობენ, რომ უმწეო ქალს მისი რძალი გამუდმებით სცემს, მთელი დღე ქალი ნახევრად შიშველი აივანზე დახოხავს. სახლიდან კი გამუდმებით ყვირილისა და ტირილის ხმა ისმის.

დღეს სოფელში ასვლას ადგილობრივი თვითმმართველობის ჯანმრთელობის დაცვისა და სოციალური უზრუნველყოფის განყოფილების თანამშრომლებიც გეგმავენ.

[თინათინ ზაზაძე, ახალციხე]