სოციალური სააგენტო 60 წლის ქალზე: ‘ჩააცვეს, მოუარეს, ამბობენ, ჩვენ მივხედავთო’

სოცილაური მომსახურების სააგენტოში აცხადებენ,რომ სოფელ სვირში 60 ქალის სხვა ოჯახში გადაყვანას ოჯახი ეწინააღმდეგება: „ჩააცვეს, მოუარეს და ამბობენ, რომ ჩვენ მივხედავთო“.

მათი ინფორმაციით, ქალს, რომელის შესახებაც მეზობლები ამბობენ, რომ ოჯახში სცემენ, ოჯახში საწოლი უკვე გამოუყვეს.
„ვაგრძელებთ მუშაობას, რომ ეს ქალი სხვა ოჯახში გადავიყვანოთ. დრო გვჭირდება იმისთვის, რომ ოჯახი დავარწმუნოთ“,– ამბობენ სოციალური მომსახურების სააგენტოს საზოგადოებასთან ურთიერთობის სამსახურში.

„სამხრეთის კარიბჭე“ სოფლის რწმუნებულს ბორის შუბითიძესაც დაუკავშირდა. რწმუნებული ამბობს, რომ ქალი კარგადა: „ძალიან კარგად უვლიან, აჭმევენ, ასმევენ, ისე, როგორც ეკადრება“.

საქართველოს შინაგან საქმეთა სამინისტროში აცხადებენ, რომ 60 წლის ქალზე ოჯახის წევრების მხრიდან შესქაძლო ძალადობის ფაქტთან დაკავშირებით გამოძიება მიმდინარეობს: „დანიშნულია ექსპერტიზა არის თუ არა ნაცემი, აქვს თუ არა ძალადობის კვალი და ასე შემდეგ. პასუხის შემდეგ გამოიკვეთება არის თუ არა ძალადობის კვალი“.

შეგახსენებთ, სოფელ სვირში მცხოვრები 60 წლის ქალის შესახებ „სამხრეთის კარიბჭემ“ მასალა 20 ივლისს მოამზადა. სოფელში ამბობენ, რომ უმწეო ქალს მისი რძალი გამუდმებით სცემს, მთელი დღე ქალი ნახევრად შიშველი აივანზე დახოხავს. სახლიდან კი გამუდმებით ყვირილისა და ტირილის ხმა ისმის.

მას შემდეგ, რაც მასალა გამოქვეყნდა, საქმეში ჩაერთო სახალხო დამცველის აპარატი, სოციალური მომსახურების სააგენტო. სოფელში ავიდნენ ახალციხის მუნიციპალიტეტის გამგეობის წარმომადგენლები.

სოციალურმა სააგენტომ განაცხადა, რომ ქალს ნამდვილად ესაჭიროება სხვა ოჯახში გადაყვანა. თუმცა, მას შემდეგ, რაც ამბავი გახმაურდა, სოფელში ამბობენ, რომ ოჯახიდან ჩხუბის ხმა ჯერ აღარ გაუგიათ.

[ვარლამ წიკლაური, ახალციხე]