სოფელ სვირში ქალზე შესაძლო ძალადობის ფაქტს ომბუდსმენის აპარატი შეისწავლის

სახალხო დამცველის აპარატის შეზღუდული შესაძლებლობის მქონე პირთა უფლებების დეპარტამენტის ხელმძღვანელის ირინე ობოლაძის განმარტებით, ფაქტს შეისწავლიან და პრობლემის მოსაგვარებლად ყველა საჭირო უწყებას მიმართავენ.

მისივე თქმით, მათ უკვე აცნობეს სოციალური სამსახურის წარმომადგენლებს.

„სოციალური სამსახურის წარმომადგენელები უკვე იყვნენ ამ ქალთან და გადაიყვანენ მეორე ძმისშვილთან. ამ სახლიდან, სადაც შესაძლო ძალადობის ფაქტია, ქალს გაიყვანენ“, – ამბობს ირინე ობოლაძე.

შეგახსენებთ, სოფელ სვირში მცხოვრები 60 წლის ქალის შესახებ „სამხრეთის კარიბჭემ“ მასალა გუშინ მოამზადა. სოფელში ამბობენ, რომ უმწეო ქალს მისი რძალი სცემს, მთელი დღე ქალი ნახევრად შიშველი აივანზე დახოხავს. სახლიდან კი გამუდმებით ყვირილისა და ტირილის ხმა ისმის.

სოციალური სამსახური სვირში გუშინ, მასალის გამოქვეყნების შემდეგ ავიდა და უკვე გადაწყდა, რომ ქალს სხვა ოჯახში გადაიყვანენ. სოციალურმა სამსახურმა ქალისთვის „მხარდამჭერის“ დანიშვნაზე დაიწყო ზრუნვა.

[ვარლამ წიკლაური, ახალციხე]