სვირში 60 წლის ქალის საქმეს საია სწავლობს

ახალციხის მუნიციპალიტეტის სოფელ სვირში, საიას გორის ოფისის იურისტთან ერთად „სამხრეთის კარიბჭეც“ იმყოფებოდა. პირველი ვიზიტისგან განსხვავებით, 60 წლის ქალი მოწესრიგებული, დავარცხნილი, დაბანილი და ჩაცმული დაგხვდა.

„სისხლის სამართლის საქმეა აღძრული და მომხდარი სოციალურმა სააგენტომაც შეისწავლა. ველოდებით რა დასკვნას დადებენ და შესაბამისად განვსაზღვრავთ სამართლებრივად როგორ დავეხმაროთ ამ ქალბატონს“,– ამბობს „ახალგაზრდა იურისტთა ასოციაციის“ გორის ოფისის ხელმძღვანელი ქეთი ბებიაშვილი.

საიას წარმომადგენლებთან ერთად, 22 ივლისს, სვირში ახალციხის მუნიციპალიტეტის გამგებლის მოადგილე რუბენ კარაპეტიანი, ასევე, ჯანმრთელობის დაცვისა და სოციალური უზრუნველყოფის განყოფილების თანამშრომლებიც იმყოფებოდნენ.

„სოციალური კუთხით დახმარებას საჭიროებს ოჯახი. ამისთვის გვჭირდება ოჯახის ქულები, შშმ პირის დამადასტურებელი საბუთი. შესაბამისი დოკუმენტების გამოთხოვის შემდეგ შეისწავლის გამგეობა და რომელ პროგრამაშიც მოხვდება იმ კუთხით დაეხმარებიან“, – ამბობს ახალციხის მუნიციპალიტეტის გამგეობის ჯანმრთელობის დაცვისა და სოციალური უზრუნველყოფის განყოფილების უფროსი თამილა ადვაძე.

შეგახსენებთ, სოფელ სვირში მცხოვრები 60 წლის ქალის შესახებ „სამხრეთის კარიბჭემ“ მასალა 20 ივლისს მოამზადა. სოფელში ამბობენ, რომ უმწეო ქალს მისი რძალი გამუდმებით სცემს, მთელი დღე ქალი ნახევრად შიშველი აივანზე დახოხავს. სახლიდან კი გამუდმებით ყვირილისა და ტირილის ხმა ისმის.

[თინათინ ზაზაძე, ახალციხე]