მუსლიმი მრევლი მოხეში: „ძველი მეჩეთის სანაცვლოდ ახალი არ გვინდა“

რელიგიის სახელმწიფო სააგენტოს თავმჯდომარე ზაზა ვაშაყმაძე მოხეში ადგილობრივ მუსლიმებს შეხვდა.

„გუშინ ვიყავი, მუსლიმებს შევხვდი, ვისაუბრეთ“, – ამბობს ზაზა ვაშაყმაძე.

თუმცა, იგი საუბარს იმის შესახებ, რომ მუსლიმები მოხეს კომისიას აღარ ენდობიან და გაუქმებას ითხოვენ, თავს არიდებს. ვაშაყმაძე არც გუშინდელი შეხვედრის დეტალებზე საუბრობს: „კომისია თავის სათქმელს პირველ დეკემბერს იტყვის“.

სამ დღეში, სამცხე–ჯავახეთის სამხარეოში ადმინისტრაციაში ე.წ. მოხეს კომისიის მორიგი სხდომა გაიმართება.

შეკითხვაზე, რა პოზიციას დააფიქსირებს მუსლიმი მრევლის სახელით სამცხე–ჯავახეთის მუფთი მამუკა ვაშაყმაძე გვპასუხობს: „ამ შენობის [მოხეს სადავო შენობა] ბედი უნდა იქნეს გადაწყვეტილი. ყველაფერს თავისი სახელი უნდა დავარქვათ“.

მოხეში მცხოვრები მუსლიმები აცხადებენ, რომ სოფელში ახალი მეჩეთის აშენება არ უნდათ. მათ არც აქამდე სალოცავად არსებული სახლის გადაცემა სურთ, რადგან მას მეჩეთის საძირკველი არ აქვს. კომისიამ კი მათ სწორედ ეს ორი ვერსია შესთავაზა.

„ახალი მეჩეთის აშენების წინააღდეგი ვართ ნებიმსიერ ადგილზე სოფელში. ვითხოვთ არსებული მეჩეთის გადმოცემას“, – ამბობს მოხეში მცხოვრები თემურ მიქელაძე.

შეკითხვაზე, რამდენად აქვთ სადავო შენობის გადაცემის იმედი, მიქელაძე შეკითხვითვე გვპასუხობს: „თქვენ აფხაზეთის დაბრუნების იმედი დაკარგული გაქვთ?!“

მოხეში მცხოვრები მუსლიმები შიშობენ, რომ ახალ სალოცავს ძველის სანაცვლოდ აუშენებენ, ეს კი არ უნდათ: „გაირკვეს ამ შენობის ბედი, წარმომავლობა და ახალ სალოცავზე ამის მერე ვილაპარაკოთ“.

სამცხე–ჯავახეთის მუფთი მამუკა ვაშაყმაძე აცხადებს, რომ პირადად იგი სოფელში ახალი სალოცავის აშენების წინააღმდეგი არაა, თუმცა ძველი მეჩეთის სანაცვლოდ ახალი არ სურს.

მოხეში მცხოვრები მუსლიმები ამის შესახებ რელიგიის სახელმწიფო სააგენტოს თავმჯდომარეს ზაზა ვაშაყმაძეს მოხეში ყოფნისას ესაუბრნენ.

„გვითხრა, თქვენ არავინ არაფერს არ გკითხავთ, სახელმწიფო რა გადაწყვეტილებასაც მიიღებს ის იქნება თქვენთვისაც მისაღებიო. ცოტა მუქარანარევი ტონი ჰქონდა, გვსაყვედურობდა. მერე თქვა, სამუშაო ჯგუფი შევქმნათ და ტერიტორია შევარჩიოთ ახალი მეჩეთის ასაგებადო. ვკითხე, მაგას რისთვის აკეთებთ–თქო და პოლემიკაში არ შემოვდივარ თქვენთანო“, – გვიყვება მიქელაძე.

შეგახსენებთ, რომ მოხეს კომისიის სხდომა პირველ დეკემბერს გაიმართება. ბოლო სხდომაზე მიღებული გადაწყვეტილების მხიედვით მუსლიმ მრევლს ორი ვერსია შესთავაზეს. მათ სახელმწიფო სოფელში ახალ მეჩეთს აუშენებს, ან იმ სალოცავს, რომელშიც ამ დრომდე ლოცულობდნენ, სახელმწიფო შეისყიდის და სარგებლობის უფლებით გადასცემს.

[თამუნა უჩიძე, ადიგენი]