მამუკა ვაშაყმაძე მოხეს კომისიის დასკვნაზე: მოგვიწევს დისკუსია, თუმცა, რადიკალიზმი არ იქნება

მოხის სადავო შენობის შემსწავლელმა კომისიამ, დღეს, 3 ნოემბერს, სხდომაზე გადაწყვიტა, რომ მოხეში სადავო შენობა არცერთ მხარეს არ გადაეცემა. სამცხე–ჯავახეთის მუფთი ფიქრობს, რომ ამ ინფორმაციის გაგების შემდეგ, მუსლიმი თემისგან სავარაუდოდ უარყოფითი დამოკიდებულება წამოვა, რადგან მუსლიმები ითხოვენ სალოცავს და ამ დრომდე ღია ცის ქვეშ ლოცლობენ. თუმცა, ვაშაყმაძე დარწმუნებულია, რომ მრევლი რადიკალურ ზომებს არ მიმართავს.

„წინასწარ ვერაფერს ვიტყვი, რადგან მუსლიმებისთვის გადაწყვეტილება უცნობია. მოგვიწევს დისკუსია და გადაწყვეტილებას მივიღებთ მუსლიმ თემთან ერთად. მაგრამ, მუსლიმი თემი არის გონიერი, დაფიქრდება და მიიღებს იმ გადაწვეტილებას, რომელიც დემოკრატიული ქვეყნისთვის იქნება აღსანიშნავი მთელს მსოფლიოში“, – განაცხადა მამუკა ვაშაყმაძემ სხდომის დასრულების შემდეგ.
ვაშაყმაძე ამბობს, რომ საკითხს თემთან ერთად განიხილავს და დარწმუნებულია, რომ მუსლიმების საკითხის მშვიდობიანად გადაწყვეტაში ხელს შეუწყობენ.

შეგახსენებთ, რელიგიის საკითხთა სახელმწიფო სააგენტოს ფარგლებში ორი წლის წინ შექმნილმა კომისიამ, რომელსაც მოხეს მეჩეთის საკითხი უნდა შეესწავლა, დღეს გადაწყვეტილება მიიღო. კომისიის გადაწყვეტილებით, შენობა არცერთ მხარეს არ გადაეცემა, იქნება კულტურული მემკვიდრეობის სააგენტოს მეთვალყურეობის ქვეშ. მუსლიმებს კი ორ ვერსიას შესთავაზებენ: პირველი, – სახელმწიფო შეისყიდის იმ კერძო შენობას, რომელშიც მუსლიმები აქამდე ლოცულობდნენ და მას გადასცემს მუსლიმებს. და მეორე, სახელმწიფო სოფელ მოხეში შეისყიდის მიწას და იმ მიწაზე მუსლიმებს აუშენებს სალოცავს.

ეს გადაწყვეტილება კომისიის წევრებმა კონსესუსის შედეგად მიიღეს. რას გადაწყვეტენ ადგილობრივი მუსლიმები, ამ ეტაპზე უცნობია. „სამხრეთის კარიბჭე“ სოფელ მოხეში გაემგზავრა და მუსლიმების დამოკიდებულებას კომისიის გადაწყვეტილებისადმი, დღის ბოლოს გაცნობებთ.

[sknews.ge]