სრულიად საქართველოს მუსლიმთა სამმართველოს განცხადება მოხეს კომისიის დასკვნაზე

"დღეს, 2016 წლის 3 ნოემბერს, ახალციხეში გაიმართა „მოხის კომისიის“ სხდომა, სადაც კომისიის წევრებმა იმსჯელეს სოფელ მოხეში მუსლიმი თემის წინაშე არსებული პრობლემების მოგვარების გზებზე. კომისიამ მუსლიმ თემს შესთავაზა ორი ვარიანტი ლოცვის პრობლემის მოხსნასთან დაკავშირებით:

1. სოფელში არსებული სამლოცველო შენობის მესაკუთრისგან გამოსყიდვა და მუსლიმთა სამმართველოზე გადაცემა;

2. სოფელში ცენტრალურ ადგილას გამოიყოს მიწის ნაკვეთი მეჩეთის აშენებისათვის. რაც შეეხება ე.წ. სადაო შენობას ამ მიმართულებით კომისია გააგრძელებს მუშაობას სამომავლოდ მის დაცულობასთან დაკავშირებით", – ნათქვამია განცხადებაში.

შეგახსენებთ, მოხის სადავო შენობის შემსწავლელმა კომისიამ, დღეს, 3 ნოემბერს, სხდომაზე გადაწყვიტა, რომ მოხეში სადავო შენობა არცერთ მხარეს არ გადაეცემა. გადაწყვეტილება კომისიის წევრებმა კონსესუსის შედეგად მიიღეს.

სამცხე–ჯავახეთის მუფთი ფიქრობს, რომ ამ ინფორმაციის გაგების შემდეგ, მუსლიმი თემისგან სავარაუდოდ უარყოფითი დამოკიდებულება წამოვა, რადგან მუსლიმები ითხოვენ სალოცავს და ამ დრომდე ღია ცის ქვეშ ლოცლობენ. თუმცა, ვაშაყმაძე დარწმუნებულია, რომ მრევლი რადიკალურ ზომებს არ მიმართავს.

ახალციხისა და ტაო–კლარჯეთის მიტროპოლიტი თეოდორე ამბობს, რომ ეს გაწყვეტილება მათთვის მისაღებია და ისინი შეეცდებიან დაელაპარაკონ, აუხსნან, როგორც მართლმადიდებელ, ისე მუსლიმ მოსახლეობას: „მათ დავეხმარებით მეგობრობაში, ურთიერთობის აღდგენასა და განმტკიცებაში“.

კომისია ადგილობრივ მუსლიმებს ორ ვერსიას სთავაზობს: სახელმწიფო შეისყიდის იმ შენობას, რომელშიც მუსლიმები აქამდე ლოცულობდნენ და მას გადასცემს მუსლიმებს. ან სახელმწიფო სოფელ მოხეში შეისყიდის მიწას და იმ მიწაზე მუსლიმებს აუშენებს სალოცავს. რა გადაწყვეტილებას მიიღებენ ადგილობრივი მუსლიმები, ამ ეტაპზე უცნობია.

[sknews.ge]