‘მოხის კომისიის’ სხდომა გადაიდო

მოხის სადავო შენობის ირგვლივ, წარმომავლობის შემსწავლელ კომისიას, 30 იანვარს, თბილისში, სახელმწიფო კანცელარიაში უნდა ემსჯელა, თუმცა სხდომა გადაიდო. როგორც კომისიის თავმჯდომარე ზაზა ვაშაყმაძე „სამხრეთის კარიბჭესთან“ აცხადებს, შეხვედრა იმის გამო გადაიდო, რომ დასავლეთ საქართველოს მუფთი, ბეგლარ ქამაშიძე საქართველოში არ იმყოფება.

„რამდენადაც ჩემთვის არის ცნობილი, ახლა საქართველოში არ იმყოფება მუფთი. გიდარსტურებთ, რომ სხდომა გადაიდო. შევუთანხმდებით სხვა წევრებს და თარიღს დავნიშნავთ მოგვიანებით“– განმარტავს ზაზა ვაშაყმაძე.

30 იანვრისათვის დაგეგმილ სხდომაზე, მუსლიმურ მხარეს, მოხეში ახალი მეჩეთის მშენებლობის საქმეზე, მუფთებისა და მოსახლეობის გადაწყვეტილება უნდა ეცნობებინა.

რა გადაწყვეტილება მიიღო მუსლიმმა მოსახლეობამ, ამ საკითხზე სამცხე–ჯავახეთის მუფთი მამუკა ვაშაყმაძე ვერ საუბრობს.
„ამ ეტაპზე ვერაფერს ვიტყვი. სხდომაზე გასატანი საკითხები მუფთათან ერთად უნდა გავიარო, იმიტომ, რომ ყველა ინფორმაცია მუფთთან იყრის თავს. ხვალისთვის ჩამოსვლას ვერ მოასწრებს, საზღვარგარეთ არის და შეხვედრები აქვს. მე როგორც ვიცი, სამშაბათს უნდა დაბრუნდეს“– ამბობს მამუკა ვაშაყმაძე.

შეგახსენებთ, რომ ‘მოხის კომისიის’ ბოლო სხდომა 2016 წლის 1 დეკემბერს, ახალციხეში სამხარეო ადმინისტრაციის შენობაში გაიმართა. მათ მიერ მიღებული გადაწყვეტილების მიხედვით, მოხეს სადავო შენობა ძეგლთა დაცვის სააგენტოს გადაეცემა და მას მიენიჭება კულტურული მემკვიდრეობის ძეგლის სტატუსი სავარაუდო სახელწოდებით -„სადავო საკულტო ნაგებობა“. მუსლიმ მრევლს კი მოხეში ახალი მეჩეთის ასაშენებლად ადგილს შესთავაზებენ.

კომისიის ამ გადაწყვეტილებას მოხის მუსლიმი მრევლის ნაწილის პროტესტი მოჰყვა.

[sknews.ge]