მოხის მუსლიმი მრევლი მოხის კომისიის გაუქმებას ითხოვს

მოხეში სადავო შენობასთან, დღეს 25 ნომებერს, პარასკევის ლოცვის შემდეგ 50–მდე ადგილობრივმა მუსლიმმა განცხადება გაავრცელა. მუსლიმი თემი მოხეს კომისიის გაუქმებასა და სადავო შენობის მათთვის გადაცემას ითხოვს. განცხადებას ხელს 73 ადგილობრივი მუსლიმი აწერს.

მათი თქმით, კომისია თავიდანვე არასწორად დაკომპლექტდა: „აქ ოთხი ადგილობრივი ქრისტიანი და ოთხი ადგილობრივი მუსლიმი უნდა ყოფილიყო, მაგრამ მხოლოდ სასულიერო ლიდერები ჩასვეს“.

გარდა კომისიის წევრებისა, მათ პრეტენზია ამავე კომისიის მუშაობასთანაც აქვთ.

„რისთვისაც იყო ეს კომისია შექმნილი თავი ვერ გაართვეს. უნდობლობას ვუცხადებთ მათ რამდენიმე უმსგავსობის გამო და გაუქმებას ვითხოვთ“, – ამბობს მოხეში მცხოვრები თამაზ ბერიძე.

მუსლიმებით თქმით, მაშინ როცა კომისია იქმნებოდა რელიგიის სახელმწიფო სააგენტოს თავმჯდომარე და ასევე მოხეს კომისიის თავმჯდომარე ზაზა ვაშაყმაძე მათ დაპირდა, რომ კომისია შენობის მუსლიმებისთვის გადაცემის საკითხს განიხილავდა თუმცა ეს ასე არ მოხდა: „ახლა გვეუბნება მიღწევაა ისიც, რომ მუსლიმი და ქრისტიანი სასულიერო ლიდერები ერთად სხედან და მრევლიც ერთამენთს ქვებს არ უშენსო“.

დღეს მოხეში მუსლიმი სასულიერო ლიდერები არ გამოჩენილან.

შეგახსენებთ, რომ მოხეს კომისია პირველ დეკემბერს ისევ ახალციხეში უნდა შეიკრიბოს.

[sknews.ge]