მოხეს სადავო შენობის შესახებ კომისიამ გადაწყვეტილება მიიღო

როგორც კულუტურული მემკვიდრეობის დაცვის ეროვნული სააგენტოს ხელმძღვანელმა ნიკა ანთიძემ განაცხადა, კომისიის გადაწყვეტილებით, მოხეში, სოფლის ცენტრში მდგარი სადავო შენობა არცერთ მხარეს არ გადაეცემა.

"მოხდება მისი დაცულობა, შენობა იქნება კულტურული მემკვიდრეობის სააგენტოს მეთვალყურეობის ქვეშ", – განაცხადა ნიკა ანთიძემ.

მისივე განმარტებით, კომისიას ორი ვერსია აქვს, რომელსაც მუსლიმებს შესთავაზებენ. პირველი: სახელმწიფო შეისყიდის იმ შენობას, რომელშიც მუსლიმები აქამდე ლოცულობდნენ და მას გადასცემს მუსლიმებს. და მეორე, სახელმწიფო სოფელ მოხეში შეისყიდის მიწას და იმ მიწაზე მუსლიმებს აუშენებს სალოცავს.

ნიკა ანთიძის განმარტებით, ამ ვერსიებს დაეთანხმნენ კომისიის წევრი მუსლიმებიც და მართლმადიდებლებიც. ახლა ამ ვერსიებს ადგილობრივ მუსლიმებს შესთავაზებენ, გადაწყვეტილება ადგილობრივებმა უნდა მიიღონ.

ეს კომენტარი შეხვედრიდან გამოსულმა ნიკა ანთიძემ მედიასთან გააკეთა. სხდომა რამდენიმე წუთის წინ დასრულდა. დეტალებზე "სამხრეთის კარიბჭე" მუშაობს. თვალი ადევნეთ ვებგვერდს.

შეგახსენებთ, დღეს, 3 ნოემბერს, სამცხე–ჯავახეთის სამხარეო ადმინისტრაციაში, სოფელ მოხეს სადავო შენობის წარმომავლობის დამდგენი კომისიის სხდომა მიმდინარეობდა. სხდომა მედიისთვის დახურული იყო.

სოფელ მოხეში, ადგილობრივი მუსლიმები და მართლმადიდებლები სოფლის ცენტრში მდგარ შენობაზე დაობენ. მუსლიმები ამბობენ, რომ ეს შენობა მეჩეთია და მათ უნდა გადაეცეთ, ქრისტიანები კი აცხადებენ, რომ ეს მეჩეთი ეკლესიის ქვებით აშენდა, ის მოქმედი მეჩეთი არასდროს ყოფილა და მის მუსლიმებისთვის გადაცემას ეწინააღმდეგებიან. აღნიშნულზე ორი წლის წინ ადგილობრივებს შორის დაპირისპირებაც მოხდა. სწორედ მაშინ შეიქმნა შენობის წარმომავლობის დამდგენი სახელმწიფო კომისია.

[sknews.ge]