'არცერთ პარტიაზე ჯვარი არ მაქვს დაწერილი, ჯვარი მხოლოდ მეუღლეზე დავიწერე' –კუბლაშვილის ულტიმატუმი პარტიას

ახალციხე-ადიგენის ოლქში, „პატრიოტთა ალიანსის“ დეპუტატობის კანდიდატი გოდერძი კუბლაშვილი დღეს, 30 აგვისტოს გამართულ ბრიფინგზე, პარტიის პოლიტიკური მდივნის გოჩა თევდორაძის „სამხრეთის კარიბჭესთან“ გაკეთებულ განცხადებას გამოეხმაურა და მისი დაზუსტება მოსთხოვა (ამ მასალაში კუბლაშვილის კანდიდატურის შესაძლო შეცვალზეა საუბარი. ს.კ.)

„ვითხოვ ბატონ გოჩასგან, დააზუსტოს ეს განცხადება, რისი თქმა უნდოდა“,- განაცხადა კუბლაშვილმა და დაამატა, რომ ლიდერები ერთპიროვნულად ჩამოყალიბდნენ მის კანდიდატურაზე, – „ან დამარეგისტრირონ და დავით თარხან-მოურავმა ხელახლა, მედიასაშუალებების წინაშე დამასახელოს, ან კიდევ საბოლოო პასუხი მითხრან“, - ამბობს კუბლაშვილი და ლიდერებს მის დასარეგიტრირებლად ვადას 1 სექტემბრამდე აძლევს.

მისივე თქმით, თუ „პატრიოტთა ალიანსი“ მის კანდიდატურაზე უარს იტყვის, გამორიცხული არა არის ბედი, სხვა პოლიტიკურ ძალებში სცადოს: „არცერთ პარტიაზე ჯვარი არ მაქვს დაწერილი, ჯვარი მხოლოდ ჩემს მეუღლეზე დავიწერე“.

გოჩა თევდორაძემ „სამხრეთის კარიბჭესთან“ გუშინ, 29 აგვისტოს განაცხადა, რომ შესაძლოა პარტიამ გოდერძი კუბლაშვილის კანდიდატურა არ დაარეგისტრიროს და სხვა კანდიდატით შეცვალოს.

გოდერძი კუბლაშვილმა, ახალციხის მედია ცენტრში გამართულ ბრიფინგზე, პარტიის ლიდერებთან კოორდინაციის არარსებობაზეც ისაუბრა და მაგალითად, რამდენიმე დღის წინ, ირმა ინაშვილის ახალციხეში ვიზიტი მოიყვანა, რომლის შესახებ არც მან და არც შტაბის უფროსმა არაფერი იცოდნენ.

„ქალბატონი ინაშვილი ყოფილა ახალციხეში. „ახალციხის ციხეზე“ ვინმე ბესიკ ტაბატაძეს შეხვედრია, რომელიც თურმე მერობის კანდიდატად უნდა, მე ეს ყველაფერი მისი ფეისბუქის გვერდიდან გავიგე“, -განაცხადა კუბლაშვილმა და დაამატა, რომ ლიდერების ვიზიტის შესახებ ადგილობრივი შტაბი ინფორმირებული უნდა იყოს.

„პატრიოტთა ალიანსის“ დეპუტატობის კადიდატმა, დამოუკიდებელ კანდიდატზე ნუგზარ პარუნაშვილზეც ისაუბრა და კანდიდატურის მოხსნა მოსთხოვა. მისი თქმით, პარუნაშვილი ქურდული სამყაროს წევრთან ტარიელ ონიანთან, მიხეილ სააკაშვილთან და კახი კალაძესთან არის გარიგებული და დეპუტატად მოსვლას მათი გავლენით აპირებს.

„მე ვვარაუდობ, რომ მათ აქვთ სქემა და მოქმედებენ. არ მინდა, რომ ონიანის, სააკაშვილის და კალაძის გავლენები იყოს ჩვენს ოლქში, ამიტომ კიდევ ერთხელ მოვითხოვ პარუნაშვილისგან, კანდიდატურა მოიხსნას და წავიდეს“, - განაცხადა კუბლაშვილმა. თუმცა რა სქემა აქვთ აღნიშნულ პიროვნებებს და რის საფუძველზე ვარაუდობს მათ კავშირებს, კუბლაშვილს ამაზე პასუხი არ აქვს.

შეგახსენებთ, "პატრიოტთა ალიანსი – გაერთიანებული ოპოზიციის“ მაჟორიტარი დეპუტატები 8 აგვისტოს პარტიის ლიდერებმა წარადგინეს. ბრიფინგი 14:00 საათზე პარტიის ცენტრალურ ოფისში, კინოს სახლში გაიმართა. დავით თარხან–მოურავმა და ირმა ინაშვილმა სულ ოთხი მაჟორიტარი დაასახელეს, მათ შორის ახალციხე–ადიგენის საარჩევნო ოლქში – გოდერძი კუბლაშვილი.

[ლუბა გიორგაძე, ახალციხე]