გოდერძი კუბლაშვილი მაჟორიტარი დეპუტატობის კანდიდატი აღარ არის

ამის შესახებ პარტიის სათაო ოფისში გადაწყვეტილება უკვე მიიღეს.

„გოდერძი ჩვენი კანდიდატი აღარ იქნება, სხვა კანდიდატს წარვადგენთ“, – განაცხადა „პატრიოტთა ალიანსის“ ცენტრალური შტაბის ხელმძღვანელმა გოჩა თევდორაძემ.

ვინ ჩაანაცვლებს კუბლაშვილს ჯერ უცნობია. თევდორაძე ამბობს, რომ ამის შესახებ გადაწყვეტილება ჯერ მიღებული არ არის.

რა პოზიცია აქვს თავად კუბლაშვილს პარტიის გადაწყვეტილებაზე უცნობია. მან „სამხრეთის კარიბჭეს“ სატელეფონო ზარებს არ უპასუხა.

შეგახსენებთ, რომ "პატრიოტთა ალიანსი – გაერთიანებული ოპოზიციის“ მაჟორიტარი დეპუტატების კანდიდატად გოდერძი კუბლაშვილი 8 აგვისტოს პარტიის ლიდერებმა წარადგინეს. ბრიფინგი 14:00 საათზე პარტიის ცენტრალურ ოფისში, კინოს სახლში გაიმართა.

კუბლაშვილის კანდიდატურის მოხსნაზე პარტიაში მას შემდეგ დაფიქრდნენ, რაც მან ცენტრალურ შტაბთან შეუთანხმებლად არა ერთი პრესკონფერენცია გამართა და საკუთარი გუნდის წევრებს დაუპირისპირდა.

[თამუნა უჩიძე, ახალციხე]