ირმა ინაშვილისგან თამაზ მეჭიაურთან – გოდერძი კუბლაშვილი კვლავ კანდიდატია

პარტიამ „თამაზ მეჭიაური-ერთიანი საქართველოსთვის“ გოდერძი კუბლაშვილის კანდიდატურა დღეს, 8 სექტემბერს წარადგინა.

„კანდიდატად უკვე დავრეგისტრირდი, ჩემი წარდგენა დღეს მოხდა. ისევ თბილისში ვარ, ჩამოვალ და დეტალებზე მერე ვისაუბროთ“, – განუცხადა „სამხრეთის კარიბჭეს“ გოდერძი კუბლაშვილმა.

პარტია -"თამაზ მეჭიაური ერთიანი საქართველოსთვის" დეპუტატმა თამაზ მეჭიაურმა 2016 წლის ივნისში შექმნა. თამაზ მეჭიაურის პარტიის სახეები არიან: ჯემალ სეფიაშვილი, სანდრო ბრეგაძე, დავით ფაცაცია, ლალი მაროშკინა და ია მეტრეველი.

შეგახსენებთ, გოდერძი კუბლაშვილი ახალციხე–ადიგენის მაჟორიტარულ ოლქში „პატრიოტთა ალიანსის“ დეპუტატობის კანდიდატი იყო. პარტიამ იგი კანდიდატად 8 აგვისტოს, თბილისში, პარტიის ცენტრალურ ოფისში, კინოს სახლში გაიმართულ წარდგენის ცერემონიალზე დაასახელა.

დასახელებიდან მალევე, გოდერძი კუბლაშვილმა საარჩევნო კამპანია დაიწყო. თითქმის ყოველდღე მართავდა ბრიფინგებს ახალციხეში, საარჩევნო მედიაცენტრში და ხვდებოდა ამომრჩევლებსაც. მალევე კუბლაშვილი ზეწოლაზე და პარტიასთან კომუნუკაციის არარსებობაზე ალაპარაკდა. სწორედ ამის შემდეგ დაფიქრდნენ პარტიაში მისი კანდიდატურის შეცვლაზე.

როგორც კი ეს ინფორმაცია გაჟღერდა, გოდერძი კუბლაშვილმა საგანგებო ბრიფინგი გამართა, პარიას მის დასარეგისტრირებლად ვადა 1 სექტემბრამდე მისცა და განაცხადა, რომ წინააღმდეგ შემთხვევაში სხვა პარტიაში გადავიდოდა.

ამ განცხადებიდან რამდენიმე დღეში „პატრიოტთა ალიანსმა“ გოდერძი კუბლაშვილი ნიკოლოზ ინასარიძით ჩაანაცვლა. მიზეზად კი კუბლაშვილისა და „ქართული ოცნების“ დეპუტატობის კანდიდატის გიორგი კოპაძის ნათესაური კავშირი, ასევე კუბლაშვილის მხრიდან, ზეწოლებზე გაკეთებული განცხადებები დაასახელა.

[ლუბა გიორგაძე, ახალციხე]