‘პატრიოტთა ალიანსმა’ ახალქალაქი-ნინოწმინდაში დეპუტატობის კანდიდატი წარადგინა

როგორც პარტიაში ამბობენ, მერუჟან კარახანიანი ბოლო რამდენიმე წელია “პატრიოტთა ალიანსის“ მხარდამჭერია და მისი კანდიდატურით 2016 წლის საპარლამენტო არჩევნებზე გამარჯვების იმედი აქვთ.

„ნამდვილად ღირსეული და მებრძოლი პიროვნებაა, მას ახალქალაქი-ნინოწმინდაში კარგი სახელი აქვს და გამარჯვებაშიც დაეხმარება“, - განაცხადა „სამხრეთის კარიბჭესთან“ საუბარში, "პატრიოტთა ალიანსის" პოლიტსაბჭოს წევრმა არჩილ ლეკიშვილმა.
„პატრიოტთა ალიანსმა“ სამცხე-ჯავახეთში მაჟორიტარი დეპუტატობის კანდიდატების დასახელება უკვე დაასრულა. პარტიას კანდიდატი რეგიონის სამივე ოლქში ეყოლება.

ალიანსიდან, საქართველოს პარლამენტში დეპუტატობის მანდატისათვის ახალციხე-ადიგენის ოლქში გოდერძი კუბლაშვილი, ბორჯომი-ასპინძა და ახალქალაქის 5 თემში, მომღერალი ზურა ხაჩიძე და ნინოწმინდა -ახალქალაქში მერუჟან კარახანიანი იქნება.

შეგახსენებთ, რომ 2016 წლის საპარლამენტო არჩევნებამდე 43 დღე დარჩა. 25 აგვისტოს მდგომარეობით, სამცხე-ჯავახეთში დეპუტატობის კანდიდატები სამ პოლიტიკურ ძალას, „ქართულ ოცნებას“, „ნაციონალურ მოძრაობას“ და „პატრიოტთა ალიანს“, ასევე სამ საინიციატივო ჯგუფს ნინოწმინდა-ახალქალაქისა და ახალციხე-ადიგენის საარჩევნო ოლქში ჰყავს დასახელებული.

ახალი საარჩევნო კოდექსის მიხედვით, 8 ოქტომბერს სამცხე-ჯავახეთის მოსახლეობა ექვსის ნაცვლად, სამ მაჟორიტარ დეპუტატს აირჩევს ახალციხე-ადიგენის, ბორჯომი-ასპინძის, ასევე ახალქალაქის 5 თემისა და ნინოწმინდა-ახალქალაქის საარჩევნო ოლქში.

[ლუბა გიორგაძე, ნინოწმინდა–ახალქალაქი]