გოდერძი კუბლაშვილი ნუგზარ პარუნაშვილს კანდიდატურის მოხსნისკენ მოუწოდებს

დღეს, 29 აგვისტოს, ახალციხის საარჩევნო მედიაცენტრში გოდერძი კუბლაშვილმა, რომელიც „პატრიოტთა ალიანსიდან“ ახალციხე–ადიგენის ოლქში მაჟორიტარი დეპუტატობის კანდიდატია პრესკონფერენცია გამართა.

მან ბრიფინგი, 19 დღის წინ, დამოუკიდებელი დეპუტატობის კანდიდატის ნუგზარ პარუნაშვილის მიერ „სამხრეთის კარიბჭესთან“ მიცემულ ინტერვიუზე პასუხით დაიწყო.

მან ნუგზარ პარუნაშვილს, მედიის საშუალებით, როგორც „პენსიონერ მეგობარს“ ისე მიმართა და 19 ივლისს წყნეთის ტაძრის ეზოში შეხვედრა გაახსენა: „გახსოვთ, იქ კაცურად ხელი რომ ჩავარტყით და ვთქვით, რომ კაცურად და ღირსეულად შევერკინებოდით ერთმანეთს?! მაგრამ თქვენ ეს პირობა „სამხრეთის კარიბჭესთან“ მიცემულ პირველივე ინტერვიუში დაარღვიეთ“.

აღნიშნულ მასალაში, ნუგზარ პარუნაშვილი აცხადებს, რომ საპარლამენტო არჩევნებში ახალციხე–ადიგენის საარჩევნო ოლქში პირველ ადგილზე გავა: „მეორეზე იქნება ვაჟა ჩიტაშვილი, მესამეზე გიორგი კოპაძე და მეოთხეზე, თუ კიდევ ვინმე არ დაასახელეს, გოდერძი კუბლაშვილი გავა“.

კუბლაშვილი პარუნაშვილის ამ განცხადებას პოლიტიკურ უმწიფრობად აფასებს და ამის გამო მოუწოდებს კანდიდატურა მოიხსნას: „თუ ხვალ, 5 საათამდე, არ მოიხსნით კანდიდატურას, გავაჟღერებ ღიად იმ სქემას, რომელ სქემაშიც არის ძალიან სერიოზული ფიგურები, როგორც მთავრობიდან ისე „ოცნებიდან“ და სამწუხაროდ, ჩემი აპრტიიდანაც კი, რომელმაც მე წარმადგინა“.

„სამხრეთის კარიბჭეს“ შეკითხვაზე რა სქემასა და სიაზეა საუბარი, კუბლაშვილმა უპასუხა, რომ იგი არ გვენდობა და ამაზე ჩვენთან არ ისაუბრებს.

რაც შეეხება შეკითხვას, ახლა რატომ პასუხობს პარუნაშვილს, რადგან მას შემდეგ იგივე მედია ცენტრში ერთხელ დებატები და ორჯერ პირადად მისი პრესკონფერენცია გაიმართა, გვიპასუხა: „რაჭვული სისხლი მაქვს და გვიან მახსენდება რაღაცეები“.

დამოუკიდებელი დეპუტატობის კანდიდატი ნუგზარ პარუნაშვილი კი კუბლაშვილის განცხადებას არასერიოზულად აღიქვამს: „თვითონ თუ უნდა, თქვას, რომ პირველ ადგილზე გავა“.

ამავე პრესკონფერენციაზე კუბლაშვილმა პოლიტიკურ ოპონენტებს მოუწოდა, რომ ადიგენსა და ახალციხეში სტადიონებზე თავინათი მხარდამჭერები შეკრიბონ: „იმათი თანდასწრებით გავმართავ თქვენთან დებატებს და სერიოზული ანგარიშით დაგამარცხებთ“.

ასევე, კუბლაშვილმა განაცხადა, რომ იგი ყოველ დღე აპირებს პრესკონფერენციები გამართოს: „ვაპირებ, 30 წლის განმავლობაში ჩემი პოლიტიკაში ყოფნის პატარ–პატარა ისტორიების მოყოლას. მინიშნებას გავაკეთებ, მოვყვები ჩემ შეხვედრის შესახებ შევარდნაძესთან, გამსახურდიასთან, სააკაშვილთან, მარგეველაშვილთან და ივანიშვილთან, როცა პრემიერი იყო“.

[თამუნა უჩიძე, ახალციხე]