მერის რიგგარეშე არჩევნებში დამოუკიდებელი კანდიდატი არ იქნება

რიგგარეშე არჩევნებზე დასარეგისტრირებლად, საინიციატივო ჯგუფს შესაბამის საოლქო საარჩევნო კომისიისათვის 22 აგვისტოს უნდა მიემართა. #37–ე ახალციხის ოლქში განმარტავენ, რომ საარჩევნო კანონმდებლობით დადგენილ ვადაში, მათთან განაცხადი არცერთ საინიციატივო ჯგუფს არ შეუტანია. ერთმა საინიციატივო ჯგუფმა საოლქო კომისიას ვადის ამოწურვის შემდეგ მიაკითხა.

#37–ე ახალციხის საოლქო საარჩევნო კომისიაში განმარტავენ, რომ საინიციატივო ჯგუფის წევრი საოლქოში 22 აგვისტოს მივიდა, თუმცა განაცხადი დარეგისტრირების შესახებ არ გაუკეთებია. საჭირო დოკუმენტაციით, საინიციატივო ჯგუფის წევრმა კომისიას მეორე დღეს, 23 აგვისტოს მიაკითხა, მაგრამ ვადებში დარღვევის გამო, დარეგისტრირება ვერ მოხერხდა, ხოლო განაცხადის ოლქში დატოვებაზე უარი თავად თქვა.

ამ დროისათვის, #37–ე ახალციხის საარჩევნო ოლქში მერობის არცერთი კანდიდატი რეგისტრირებული არ არის. კანონმდებლობის მიხედვით, პარტიებს საკუთარი წარმომადგენლის დარეგისტრირება 8 სექტემბარმდე შეუძლიათ. რეგისტრაცია შესაბამის საოლქო საარჩევნო კომისიებში უნდა მოხდეს.

შეგახსენებთ, რომ მერისა და გამგებლების რიგგარეშე არჩევნების შესახებ ცნობილი 19 აგვისტოს გახდა. ადგილობრივი თვითმმართველობის პირველი პირების არჩევნები საპარლამენტო არჩენებთან ერთად, 8 ოქტომბერს გაიმართება. არჩევნები ჩატარდება ახალციხეში, ბოლნისში, ზუგდიდში, წალენჯიხაში, ჭიათურასა და ხარაგაულში. ახალციხეში მერს, დანარჩენ მუნიციპალიტეტებში კი გამგებლებს აირჩევენ.

[sknews.ge]