ვის შეუძლია მერის რიგგარეშე არჩევნებში მონაწილეობა

ახალციხის მერის რიგგარეშე არჩევნები 19 აგვისტოს დაინიშნა. საარჩევნო კოდექსის მიხედვით, იმავე დღეს, მერობის კანდიდატებისათვის წინასაარჩევნო კამპანია დაიწყო.

2016 წლის აპრილის თვემდე, მერის/გამგებლის რიგგარეშე არჩევნებში საკუთარი კანდიდატის წარდგენა მხოლოდ იმ პატრიებს შეეძლოთ, რომლებიც ადგილობრივი თვითმმართველობის ბოლო არჩევნებში მონაწილეობდნენ. აღნიშნულ მოცემულობას სააჩევნო კოდექსის 169(2) მუხლის მე–4 პუნქტი ითვალისწინებდა, რომელიც 2016 წლის 14 აპრილს საქართველოს საკონსტიტუციო სასამართლოს გადაწყვეტილებით, ძალადაკარგულად გამოცხადდა და რიგგარეშე არჩევნებში მონაწილეობის უფლება ყველა პარტიას მიეცა.

2016 წლის 8 ოქტომბრის რიგგარეშე არჩევნებში მონაწილეობისათვის, პარტიას ან საარჩევნო ბლოკს, ცესკოსთვის 23 აგვისტოს ჩათვლით უნდა მიემართა. უკვე რეგისტრირებულ პარტიებს კი მერობის კანდიდატის დარეგისტრირება 8 სექტემბრამდე შეუძლიათ.

ცენტრალური საარჩევნო კომისიის ინფორმაციით, 2016 წლის 8 ოქტომბრის რიგგარეშე არჩევნებზე მონაწილეობას 11 პოლიტიკური პარტია და 1 ბლოკი მიიღებს.

ეს პოლიტიკური სუბიექტები არიან:

პარტიები
1. "ქართული ოცნება - დემოკრატიული საქართველო";
2. "საქართველოს პატრიოტთა ალიანსი";
3. "ახალი მემარჯვენეები";
4. "რესპუბლიკური პარტია ";
5. "მრეწველობა გადაარჩენს საქართველოს";
6. "სამოქალაქო პლატფორმა- ახალი საქართველო";
7. "ახალი პოლიტიკური ცენტრი გირჩი";
8. "მოძრაობა სახელმწიფო ხალხისთვის";
9. "ეროვნული ფორუმი";
10. "ევროპული საქართველო";
11. "თავისუფალი დემოკრატები";

ბლოკი
1. "ერთიანი ნაციონალური მოძრაობა"

ადგილობრივ თვითმმართველობის ბოლო არჩევნებზე, რომელიც 2014 წლის 15 ივნისს გაიმართა, ცესკოში 24 პოლიტიკური პარტია იყო რეგისტრირებული.

ახალციხეში მერობის კანდიდატი ოთხ მათგანს ჰყავდა:
"ნინო ბურჯანაძე – ერთიანი ოპოზიცია“ კანდიდატი – ზაზა ნათენაძე;
"ერთიანი ნაციონალური მოძრაობა“ – გელა დემეტრაძე;
"სალომე ზურაბიშვილი − საქართველოს გზა“ – გოჩა ათოშვილი;
"ქართული ოცნება“ – გიორგი კოპაძე.


მერბის კანდიდატები 2014 წლის არჩევნებზე

ამ დროისათვის, N37–ე ახალციხის საოლქო საარჩევნო კომისიაში, არცერთი კანდიდატი ოფიცილურად დარეგისტრირებული არ არის. საინიციატივო ჯგუფებისათვის, რომლებსაც შეეძლოთ მერობის კანდიდატად დამოუკიდებელი (უპარტიო) პიროვნება დაესახელებინათ, რეგისტრაციის ვადა ამოწურულია. კანდიდატების დარეგისტრირებას მხოლოდ პოლიტიკური პარტიები/ბლოკები შეძლებენ. მათ შესაბამის საოლქო საარჩევნო კომისიას 8 სექტემბრამდე უნდა მიმართონ.

N37–ე ახალციხის ოლქში, მერის რიგგარეშე არჩევნები იმის გამო დაინიშნა, რომ 8 ოქტომბრის საპარლამენტო არჩევნებში, "ქართულმა ოცნებამ“ მაჟორიტარობის კანდიდატად ყოფილი მერი, გიორგი კოპაძე დაასახელა. შესაბამისად, მან მიმდინარე წლის 9 აგვისტოს გადადგომის შესახებ განცხადება დაწერა.

საარჩევნო კოდექსის მიხედვით, 8 ოქტომბერს არჩეული ახალი მერი, თანამდებობაზე ქალაქ ახალციხის საკრებულოს უფლებამოსილების დარჩენილი ვადით იმუშავებს.

[თაკო ფეიქრიშვილი, ახალციხე]