ახალციხეში მერის რიგგარეშე არჩევნები დაინიშნა

შესაბამისი განკარგულება საქართველოს პრეზიდენტმა გიორგი მარგველაშვილმა დღეს გამოსცა.

საქართველოს პრეზიდენტის ადმინისტრაციის ინფორმაციით, განკარგულება ასევე კონტრასიგნირებულია პრემიერ-მინისტრ გიორგი კვირიკაშვილის მიერ.

შეგახსენებთ, ”ქართულმა ოცნებამ” პარლამენტის მთელ რიგ მაჟორიტარულ ოლქებში მოქმედი მერები, გამგებლები და საკრებულოს წევრები წარადგინა. ეს შესაბამის ადგილობრივი თვითმმართველ ორგანოებში რიგგარეშე არჩევნების ჩატარებას იწვევს.

სამცხე–ჯავახეთში რიგგარეშე არჩევნები მხოლოდ ახალციხეში უნდა ჩატარდეს, ვინაიდან, "ქართული ოცნების" მაჟორიტარობის კანდიდატი ახალციხე–ადიგენის საარჩევნო ოლქში, ახალციხის ყოფილი მერი გიორგი კოპაძეა.

ახალციხის მერის მსგავსად, უფლებამოსილება ვადამდე ადრე შეუწყდათ ჭიათურის, ბოლნისის, ხარაგაულის, ზუგდიდისა და წალენჯიხის მუნიციპალიტეტების გამგებლებს.

რაც შეეხება საკრებულოებს, კანდიდატად წარდგენილია ზუგდიდის საკრებულოს თავმჯდომარე და თბილისის საკრებულოს სამი წევრი.

შეგახსენებთ, "ქართულმა ოცნებამ" ყოფილი მერი, გიორგი კოპაძე, ახალციხე–ადიგენის საარჩევნო ოლქში მაჟორიტარობის კანდიდატად 7 აგვისტოს წარადგინა. 9 აგვისტოს ყოფილმა მერმა გადადგომის შესახებ დაწერა განცხადება. მისი განცხადება საკრებულოს წევრებმა ცნობად 10 აგვისტოს მიიღეს. იმავე დღეს, მერის მოვალეობის შესრულება ვიცე მერს, ილია ზარდიაშვილს დაეკისრა.

მერიის დატოვებისას გიორგი კოპაძემ განაცხადა, რომ რიგგარეშე არჩევნებში შესაძლოა მერობის ერთ–ერთი კანდიდატი ვიცე მერი ილია ზარდიაშვილი იყოს.

[ნინო ნარიმანიშვილი, ახალციხე]