საჯარო მოხელეებს სამუშაო საათებში საარჩევნო აგიტაციაში ადანაშაულებენ

სამცხე–ჯავახეთის სამხარეო ადმინისტრაციასა და ახალციხის თვითმმართველობებში დასაქმებულმა საჯარო მოხელეებმა, სამუშაო საათებში ფეისბუქის პირად გვერდებზე, სხვადასხვა დროს, „ქართული ოცნების“ აგიტაციისა და სარეკლამო ელემენტების შემცველი მასალები გააზიარეს.

7 აგვისტოს, კვირა საღამოს, პარტია „ქართული ოცნების“ თავმჯდომარემ გიორგი კვირიკაშვილმა, ახალციხეში, სამცხე–ჯავახეთის მუნიციპალიტეტებში, „ქართული ოცნების“ მაჟორიტარი დეპუტატობის კანდიდატები წარადგინა.

8 აგვისტოს, ორშაბათს, სამუშაო საათებში სახელმწიფო რწმუნებულის გუბერნატორის აპარატში უფროსმა სპეციალისტმა ირინა ნათენაძემ წინა საღამოს „ქართული ოცნების“ კანდიდატების წარდგენის ამსახველი ვიდეო რგოლი საკუთარი ფეისბუქის გვერდზე გააზიარა.


ამავე დღეს, სამუშაო საათებში, ასევე 7 აგვისტოს მაჟორიტარი კანდიდატების წარდგენის ცერემონიის ამსახველი ფოტო მასალა და ტექსტი გააზიარა გუბერნატორის ადმინისტრაციის ადგილობრივი თვითმმართველობის ორგანოებთან ურთიერთობის სამსახურში უფროსმა სპეციალისტმა ირმა მერაბიშვილმა.

როგორც „სამხრეთის კარიბჭეს“ გუბერნიაში განუცხადეს, 8 აგვისტოს არც მერაბიშვილი და არც ნათენაძე შვებულებაში არ იმყოფებოდნენ.


იგივე მასალა, ასევე 8 აგვისტოს, ორშაბათს, სამუშაო საათებში გააზიარა ახალციხის მერიის საზოგადოებასთან ურთიერთობის სამსახურის სპეციალისტმა სალომე ანთაძემ.

როგორც მან „სამხრეთის კარიბჭესთან“ სატელეფონო საუბარში განაცხადა, 8 აგვისტოს შვებულებაში არ იყო და ჩვეულებრივ მუშაობდა: „შვებულებაში 16 აგვისტოდან გავედი“.

საჯარო მოხელეებმა „ობიექტივის“ ეთერში 17 აგვისტოს გასული გადაცემაც გააზიარეს. გადაცემაში ახალციხე–ადიგენის ოლქში მაჟორიტარი დეპუტატობის კანდიდატი და ახალციხის ყოფილი მერი გიორგი კოპაძე წინასაარჩევნო კამპანიასა და საკუთარ წარმატებებზე საუბრობს.

გადაცემა, კომენტარით: „ბატონო გიორგი მეამაყებით, წარმატებები!“ ახალციხის მერიის საზოგადოებასთან ურთიერთობის სპეციალისტმა სოფო (ნანა) მესხმა 17 აგვისტოსვე, გააზიარა.


იგივე გადაცემა, ასევე სამუშაო საათებში, იმავე დღეს გააზიარა ახალციხის მერიის იურისტმა მერი გოგოლაურმაც.

22 აგვისტოს „ქართული ოცნების“ თავმჯდომარემ გიორგი კვირიკაშვილმა გიორგი კოპაძე, ამჯერად ადიგენში წარადგინა.


23 აგვისტოს, სამშაბათ დღეს, კოპაძის ადიგენში წარდგენა სამუშაო საათებში ფეისბუქის პირად გვერდებზე გააზიარეს ახალციხის მერიის თანამშრომლებმა: ზედამხედველობის სამსახურის უფროსმა ნაირა სამსონიძემ, ახალციხის მერიის კულტურის სამსახურის წარმომადგენელმა ინგა დიაკონოვამ და ახალციხის მერის თანაშემწემ მარიკა პარუნაშვილმა.


იმ დღეებში, როცა მერიის თანამშრომლებმა აგიტაციის შემცველი მასალები გაავრცელეს, დიდი ალბათობით შვებულებაში არ იმყოფებოდნენ. მათთან „სამხრეთის კარიბჭემ“ სხვადასხვა დროს, სხვადასხვა სამსახურეობრივი საკითხების გარკვევა სცადა და ეს პირები ამ დროისთვის ჩვეულებრივ სამსახურეობრივ საქმიანობას ახორციელებდნენ.

უფრო ზუსტად, იმის შესახებ, ვინ როდის იყო შვებულებაში რედაქცია ინფორმაციას საჯარო უწყებებიდან წერილობრით მიიღებს. ამის შესახებ მოთხოვნა თვიმმართველობებსა და სამხარეო ადმინსიტრაციაში გუშინ, 23 აგვისტოს წარვადგინეთ.

„საერთაშორისო გამჭვირვალობა – საქართველოსა“ და „ახალგაზრდა იურისტთა ასოციაციის“ იურისტების განამრტებით, საჯარო მოხელეების მიერ სოციალური ქსელის საშუალებით სამუშაო საათებში პარტიული აქტივობისა და წინასაარჩევნო კამპანიის ამსახველი მასალის გავრცელება აგიტაციაა.

იურისტების განმარტებით, ეს საარჩევნო კოდექსის 45 -ე მუხლის, მე -4 ნაწილის თ ქვეპუნქტის დარღვევაა. რაც სახელმწიფო ხელისუფლებისა და ადგილობრივი თვითმმართველობის ორგანოების საჯარო მოხელეების მიერ, სამუშაო საათების განმავლობაში ან/და როდესაც ისინი უშუალოდ ასრულებენ სამსახურებრივ ფუნქციებს, წინასაარჩევნო კამპანია–აგიტაციას გულისხმობს. აღნიშნული ქმედება ამავე კოდექსის 79–ე მუხლით ჯარიმას 2 000 ლარს ითვალისწინებს.

„კვირიკაშვილი რომ წარადგენს დეპუტატობის კანდიდატს, მაგ დროს ის არის პარტიის ხელმძღვანლელის სტატუსით და შესაბამისად ამ მოვლენას არანაირი საერთო არ აქვს მთავრობის საქმიანობასთან, ეს პარტიული აქტივობაა. პარტიული აქტივობის გაზიარება არის აგიტაცია და აგიტაცია სამსახურეობრივი მოვალეობის შესრულების პერიოდში იკრძალება“, – აცხადებს „საერთაშორისო გამჭვირვალობა – საქართველოს იურისტი“ გიგი ჩიხლაძე.

მისივე თქმით, დარღვევაა „ობიექტივის“ ეთერში დეპუტატობის კანდიდატის წინასაარჩევნო გამოსვლის გაზიარებაც: „როცა საარჩევნო სუბიექტი აპიარებს საკუთარ თავს, ეს ბუნებრივია წინა საარჩევნო აგიტაციაა და ამის გაზიარებაც შესაბამისად სამუშაო საათებში საჯარო მოხელეების მიერ აგიტაციად ითვლება“.

სოციალურ ქსელში აგიტაცია რომ იკრძალება, ამის შესახებ თავისუფალი და სამართლიანი არჩევნებისათვის უწყებათაშორისი კომისიის რეკომენდაციაშიცაა მითითებული: „წინასაარჩევნო აგიტაციად უნდა ჩაითვალოს წინასაარჩევნო ღონისძიების ორგანიზებაში მონაწილეობა, საარჩევნო მასალების გავრცელება, მხარდამჭერთა სიებზე მუშაობა, პოლიტიკური პარტიების წარმომადგენლობებში ყოფნა, წინასაარჩევნო ღონისძიებისას საარჩევნო სუბიექტის/კანდიდატის მხარდასაჭერად ან საწინააღმდეგოდ მიმართული, ამომრჩეველთა აზრის ფორმირების მიზნით განხორციელებული ქმედება (სიტყვით მიმართვა, ტაში, სტვენა, ზეპირი ან წერილობითი მოწოდება), მსვლელობა, მაისურის ან სხვა ატრიბუტის ტარება შესაბამისი საარჩევნო სუბიექტის/კანდიდატის მხარდამჭერი გამოსახულებით, სოციალურ ქსელებში აგიტაცია ან კონტრაგიტაცია.

[თამუნა უჩიძე, ახალციხე]