წინასაარჩევნო დარღვევები სამცხე–ჯავახეთში – „მრავალეროვანი საქართველოს“ ანგარიში

„მრავალეროვანი საქართველო“ წინასაარჩევნო პერიოდს 8 აგვისტოდან 18 სექტემბრის ჩათვლით ეთნიკური უმცირესობებით დასახლებულ რეგიონებში სამცხე–ჯავახეთში, ქვემო ქართლსა და კახეთში აკვირდებოდა.

საანგარიშო პერიოდში სამივე რეგიონში გამოვლენილ იქნა: ა) აღსრულებითი ადმინისტრაციული რესურსების სავარაუდო გამოყენების 9 ფაქტი; ბ) აღსრულებითი ადმინისტრაციული რესურსების გამოყენების 2 ფაქტი; გ) ფინანსური ადმინისტრაციული რესურსების სავარაუდო გამოყენების 1 ფაქტი; დ) ინსტიტუციონალური ადმინისტრაციული რესურსების გამოყენების 10 ფაქტი; ე) ინსტიტუციონალური ადმინისტრაციული რესურსების სავარაუდო გამოყენების 2 ფაქტი.

ახალქალაქსა და ნინოწმინდაში „მრავალეროვანი საქართველოს“ დამკვირვებლების ინფორმაციით, „ქართული ოცნების“ მიერ ორგანიზებულ წინასაარჩევნო შეხვედრებზე, საბიუჯეტო სამსახურების წარმომადგენლები აცხადებდნენ, რომ თუ შეხვედრაზე არ მივიდოდნენ შესაძლოა სამსახური დაეკარგათ. მაგალთად, სამუშაო საათებში, პრემიერ მინისტრის გიორგი კვირიკაშვილის შეხვედრას, 22 აგვისტოს ახალქალაქში, ესწრებოდნენ, გამგეობის თანამშრომლები, განათლების რესურს ცენტრის უფროსი, სკოლების დირექტორები და მასწავლებლები.

13 სექტემბერს კი როგორც ახალქალაქში, ისე ნინოწმინდაში „ქართული ოცნების“ მაჟრიტარობის კანდიდატს ენზელ მკოინის ამომრჩევლებთან შეხვედრებზე იმყოფებოდნენ ნინოწმინდისა და ახალქალაქის მუნიციპალიტეტის გამგეობის თანამშრომლები, ასევე, სკოლის პედაგოგები. შეხვედრები გაიმართა შემდეგ სოფლებში სოფლებში: დადეშა (11.40-12.25-მდე), კარწახი (12.40-13.30-მდე), ბოზალი (13.45-14.15-მდე) და სულდა (14.25-14. 50-მდე).

22 აგვისტოს, სამუშაო საათებში გაიმართა ადიგენში „ქართული ოცნება - დემოკრატიული საქართველოს“ აქცია. მასში მონაწილეობას იღებდნენ ახალციხის მერიის 3 თანამშრომელი, კერძოდ, საქმის წარმოებისა და ადამიანური რესურსების მართვის განყოფილების უფროსი გიორგი გვარამაძე, მერის მოადგილე ზაზა გელაძე და მერიის კულტურის სამსახურის უფროსი გელა ძამუნაშვილი. ღონისძიებაში ასევე მონაწილეობას იღებდა ადგიგენის გამგებლის მოადგილე მინდია ჯელია.

„მრავალეროვანი საქართველოს“ გრძელვადიანი დამკვირვებლის მიერ 22 აგვისტოს დაფიქსირდა აგიტაციის ფაქტი სამუშაო საათებში ახალციხის მუნიციპალიტეტში. კერძოდ, ნანა მესხი, ახალციხის მერიის საზოგადოებასთან ურთიერთობის სამსახურის თანამშრომელი, მერი გოგოლაური, მერიის იურიდიული სამსახურის თანამშრომელი, ინგა დიაკონოვა, კულტურის სამსახურის თანამშრომელი, ნაირა სამსონიძე, ზედამხედველობის სამსახურის უფროსი და მარიკა პარუნაშვილი, მერის თანაშემწე სამუშაო საათებში აგიტაციის მიზნით აზიარებდნენ „ქართული ოცნება - დემოკრატიული საქართველოს“ მაჟორიტარობის კანდიდატის გიორგი კოპაძის გამოსვლებს და „ქართული ოცნება - დემოკრატიული საქართველოს“ მიერ ორგანიზებული აქციის ამსახველ სურათებს.

მრავალეროვანი საქართველოს ანგარიშში მოხვდა, ნინოწმინდის პოლიციის თანამშრომლის, მგერ გომციანის სამსახურიდან გათავისუფლების ფაქტიც. როგორც გომციანის დედა, ლიდა ანტანოსიანი ამბობს იგი „ერთიანი ნაციონალური მოძრაობის“ აქტივისტია და მისი შვილი სამსახურიდან ამის გამო გაათავისუფლეს.

როგორც ანგარიშში ვკითხულობთ, მიმდინარე წლის 12 სექტემბერს ახალქალაქის პოლიციის უფროსმა შალვა ლომსაძემ (რომელიც ამჟამად განთავისუფლებულია თანამდებობიდან) პირადი სატაბელო იარაღით „ქართული ოცნება - დემოკრატიული საქართველოს“ ადგილობრივი ოფისის წინ მდგომ მანქანაზე მიკრული „ერთიანი ნაციონალური მოძრაობის“ სარეკლამო პლატაკი ჩამოხია. მან ასევე მოითხოვა, რომ ავტომობილი დაუყოვნებლივ გაეყვანათ მითითებული ტერიტორიიდან. აღნიშნულ ფაქტს ადასტურებენ თვითმხილველები.

„მრავალეროვანი საქართველოს“ ანგარიშის მიხედვით, ახალქალაქში, „ქართული ოცნება - დემოკრატიული საქართველოს“ მაჟორიტარობის კანდიდატის ენზელ მკოიანის მხარდამჭერები ადგილობრივი ტაქსის ავტომობილების მძღოლებს ურიგებდნენ 20 ლარიან საწვავის ტალონებს მაჟორიტარი კანდიდატისა და პარტიის მხარდაჭერის სანაცვლოდ. აღნიშნულ ფაქტს ადასტურებს ერთერთი ტაქსის მძღოლი, რომელმაც უარი განაცხადა საწვავის ტალონის აღებაზე (არსებობს შესაბამისი ჩანაწერიც).

„მრავალეროვანი საქართველო“ პროექტს საარჩევნო სისტემების საერთაშორისო ფონდის (IFES) ფინანსური მხარდაჭერით ახორციელებს.

[თამუნა უჩიძე, ახალციხე]