‘შეიძლება ოთახში შევედი და გამოვედი’ – რას ამბობს გიორგი კოპაძე 6 აგვისტოს გამართულ შეხვედრაზე [Video]

ახალციხის ყოფილი მერი და „ქართული ოცნების“ მაჟორიტარი დეპუტატობის კანდიდატი ახალციხე–ადიგენის ოლქში გიორგი კოპაძე აცხადებს, რომ 6 აგვისტოს, შაბათ დღეს, იგი ჩვეულ სამუშაო რეჟიმში იყო.

„იმ შეხვედრაზე, რომელზეც თქვენ ლაპარაკობთ, მე მაინტერესებდა და გავაკრვიე, იმიტომ რომ თქვენ ატეხეთ ამაზე აჟიოტაჟი. ბატონი ზაზა მელიქიძე [გამგებელი ს.კ] ხვდებოდა რწმუნებულებს და დეპუტატებს. იქ იყო ლაპარაკი კომბაინებზე, იქ იყვნენ სხვადასხვა წარმომადგენლები, როგორც მათ განმიმარტეს. მეც ვიყავი იმ შენობაში“, – აცხადებს კოპაძე.

იმ ფაქტს, რომ საკონფერენციო დარბაზი გიორგი კოპაძემ „ქართული ოცნების“ აქტივისტებთან ერთად დატოვა, „სამხრეთის კარიბჭე“ თავად შეესწრო.

„შეიძლება შევედი ოთახში და გამოვედი, ყოველ შემთხვევაში არ ვიყავი და არ ვმონაწილეობდი ამ პროცესში“, – განაცხადა კოპაძემ.

შეხვედრაში გიორგი კოპაძე რომ არ მონაწილეობდა, ამის შესახებ იმ დღეს მერიის საზოგადოებასთან ურთიერთობის სამსახურის წარმომადგენელს არაფერი უთქვამს. როგორც მაშინ სოფო მესხმა „სამხრეთის კარიბჭეს“ განუმარტა „ეს სამუშაო შეხვედრა იყო“.

გიორგი კოპაძე ამბობს, რომ რა გვითხრა სოფო მესხმა არ იცის: „თქვენ გირჩევნიათ ყურადღება იმას მიაქციოთ, სხვები როგორ იყენებენ ამ რესურსს, მაგრამ მის შეკვეთას ასრულებთ და ამას როგორ გააკეთებთ“.



შეგახსენებთ, გიორგი კოპაძე მერიის თანამშრომლებთან ერთად, 6 აგვისტოს „ქართული ოცნების“ აქტივისტებს ადმინისტრაციულ შენობაში შეხვდა. შეხვედრას ესწრებოდნენ ახალციხის მუნიციპალიტეტის გამგებლის მოადგილე, ადმინისტრაციის უფროსი და სხვა თანაშრომლები ასევე, ადმინისტრაციულ ერთეულებში გამგებლის წარმომადგენლები. შეხვედრა, როგორც „ოცნების“ ერთ–ერთმა აქტივისტმა „სამხრეთის აკრიბჭესთან“ განაცხდა, მეორე დღეს ახალციხეში „ქართული ოცნების“ კანდიდტების წარდგენას უკავშირდებოდა.

[თამუნა უჩიძე, ახალციხე]