ახალციხის თემში 'მთის კანონი' უკვე 7.780 პირს ეხება

„პირველადი რეგისტრაციით 15 თებრვლამდე სტატუსი მიენიჭა პედაგოგებს, სოციალურად დაუცველებს, საჯარო სფეროში დასაქმებულ პერსონალს, რამაც ჯამში 7012 კაცი შეადგინა. ჩვენ ინდივიდუალური განცხადებებით 800–მა პირმა მოგვმართა, აქედან მხოლოდ 32–ს ეთქვა უარი“, – განმარტავს ახალციხის მუნიციპალიტეტის გამგეობის ჯანმრთელობის დაცვისა და სოციალური უზრუნველყოფის განყოფილების უფროსი თამილა ადვაძე.

მისივე თქმით, 7 კაციან საბჭოს, რომლსაც კონკრეტული სოფლის გამგებლის წარმომადგენელიც ესწრება დამატებით 800 განცხადება აქვს განსახილველი.

„დაჩქარებული წესით გავიხილავთ აგვისტოს ბოლომდე, რომ მოვასწროთ და სტატუსი მივანიჭოთ. კარდაკარ მოვიარეთ პენსიონერები. ვიყავით ასევე სოციალური პაკეტის მიმღებ პირებთან და შშმ პირებთან, ვისაც 1 სექტემბრიდან შეღავათებით სარგებლობა უწევს და დამოუკიდებლად დოკუმენტების შეგროვებას ვერ შეძლებდა“, – განმარტავს თამილა ადვაძე.

1 იანვრიდან მაღალმთიან დასახლებაში მცხოვრები მოქალაქე სტატუსის მინიჭების შემდეგ ყოველ პირველ და მეორე ახალშობილზე, ერთი წლის განმავლობაში სახელმწიფოსგან 100 ლარიან დახმარებას მიიღებს. მესამე და ყოველ მომდევნო შვილზე კი 200 ლარს–ორი წლის განმავლობაში.

თამილა ადვაძის განმარტებით, თანხა იმ ახალშობილის მშობლებს გადაეცემა, რომლის ერთერთი–დედა ან მამა მაღალმთიანის სტატუსის მქონეა. შეღავათი სტატუსის მინიჭების შემდეგ ამოქმედდება: „განაცდურ თვეებზე ვერ მიიღებს. რაც შეეხება დანარჩენ შეღავათებს 1 სექტემბრიდან ამოქმედდება და ამიტომ ვჩქარობთ“.

ახალციხის თემში მაღალმთიანი დასახლების სტატუსი 32 სოფელს და 1 ქალაქს აქვს მინიჭებული. როგორც თვითმმართველობაში განმარტავენ, რეგიონული განვითარებისა და ინფრასტრუქტურის სამინისტროს დამატებით 4 სოფლისთვის სთხოვენ სტატუსის მინიჭებას. ესენია: მუგარეთი, ზემო სხვილისი, წყრუთი და გურკელი. ამ ეტაპზე მუნიციპალიტეტში სტატუსის გარეშე 13 სოფელია დარჩენილი.

[თინათინ ზაზაძე, ახალციხე]