ახალციხის მუნიციპალიტეტში ‘მთის კანონის’ შეღავათები 264 პედაგოგს ეხება

ამ სიაში ის პედაგოგები არიან, რომლებიც რეგისტრირებულები არიან მაღალმთიან დასახლებაში და ამავე დროს მუშაობენ მაღალმთიან დასახლებაში მდებარე საჯარო სკოლაში.

ახალციხის მუნიციპალიტეტის გამგეობის ჯანმრთელობის დაცვისა და სოციალური უზრუნველყოფის განყოფილების უფროსის თამილა ადვაძის განმარტებით, სია თვითმმართველობას ახალციხის საგანმანათლებლო რესურსცენტრმა გადასცა. შემდეგ კი მონაცემები რეესტრში გადამოწმდა.

„მთელი წლის განმავლობაში მონიტორინგის სამსახურის მიერ გადამოწმდება აღნიშნული მონაცემები თუ გამოვლინდა რომ პედაგოგი ფაქტობრივად არ ცხოვრობს იმ ზონაში, შეუწყდება სტატუსი და ამოვარდება სიიდან“, – განაცხადა თამილა ადვაძემ.

ახალციხის მუნიციპალიტეტში ჯამში 39 სკოლაა, 38 საჯარო და 1 კერძო. მუნიციპალიტეტის 46 დასახლებიდან მაღალმთიანის სტატუსი 30–მა დასახლებამ მიიღო, ამათგან სკოლა 15 დასახლებაშია.

„მთის კანონით“ გათვალისწინებული შეღავათების ამოქმედება პედაგოგებისთვის 2016 წლის 1 სექტემბრიდან იწყება. ამ დროიდან მასწავლებლებს დაუწესდებათ სახელფასო დანამატი არანაკლებ 35%-ის ოდენობით. სპეციალური რეგიონული პროგრამების მონაწილე მასწავლებლებს კი დაუწესდებათ დამატებითი ანაზღაურება ხელფასის არანაკლებ 50%-ის ოდენობით.

ასევე, იმ პედაგოგებს, რომლებსაც 1 ან 2 არასრულწლოვანი შვილი ჰყავთ, საშემოსავლო გადასახადი უნახევრდებათ, ხოლო ისინი, ვისაც 3 ან მეტი შვილი ჰყავს, საშემოსავლო გადასახადისგან თავისუფლდებიან.

ის პედაგოგები, რომლებიც არ ცხოვრობენ და ასევე, არ არ არიან რეგისტრირებული მაღალმთიან დასახლებაში, მაგრამ ასწავლიან მაღალმთიანი სტატუსის მქონე დასახლებაში, შეღავათებით ვერ ისარგებლებენ.

[თინათინ ზაზაძე, ახალციხე]