მაჟორიტარობის კანდიდატი ვახტანგ გომელაურს ოჯახის უსაფრთხოებას სთხოვს

დღეს, 19 აგვისტოს, გოდერძი კუბლაშვილმა ახალციხის საარჩევნო მედიაცენტრში ბრიფინგი გამართა. მანსაარჩევნო კონკურენტებს ფერისცვალების დღესასწაული ‘განსაკუთრებით მიულოცა’ და საზოგაოებას მედიის საშუალებით ოჯახი გააცნო: „ჩემი მეუღლე – ნონა თელიაშვილი, ახალციხის კულტურის სამსახურის სპეციალისტი და ჩემი შვილები: თეკლა, მარიამი და ილია კუბლაშვილები, რომლებიც ახალციხის პირველ სკოლაში სწავლობენ, ფრიადოსნები არიან“.

ამის შემდეგ კუბლაშვილმა სახელმწიფო უსაფრთხოების სამსახურის უფროსს ვახტანგ გომელაურს მიმართა და არჩევნებამდე მისი და ოჯახის წევრების დაცვა სთხოვა.

„თუ რას ვგულისხმობ, პირადად მინდა, რომ ვუთხრა მას. თუ ვერ მოიცლის ამისთვის, მასთან მუშაობს ჩემი უახლოესი მეგობარი, ის მისი მეგობარიცაა, სახელსა და გვარს არ დავასახელებ, მისით შემიძლია გადავცე ის საშიშროება, რაც ჩემს ოჯახს ემუქრება“, – განაცხადა კუბლაშვილი.



მისი თქმით, იგი ორი თვის წინ, საგურამოსთან ავარიაში მოჰყვა: „რომ გავაანალიზე, მივხვდი, რომ ეს არ იყო შემთხვევითი. ასევე, ერთი კვირის წინ დასაჭერად გამიმიტეს. ამის შესახებ დეტალებს მხოლოდ გომელაურთან, ან ჩემ და მის უახლოეს მეგობართან ვიტყვი“.

კუბლაშვილმა ამ ორი ფაქტის გამოძიება გომელაურს სთხოვა. შეკითხვებზე, ვისი მხრიდან გრძნობს იგი საშიშროებას, ხელისულფლების, ოპოზიციის თუ რაიმე სხვა ძალას გულისხმობს, ან უკავშირდება თუ არა ეს მის პოლიტიკურ მიზნებს, გვპასუხობს: „ნაცების“ გადმონაშთისგან არის ეს საშიშროება და დიახ, ჩემ პოლიტიკაში გამოჩენას უკავშირდება“.

2 თვის წინ, 21 ივნისს, მაშინ როცა, როგორც ამბობს, ავტოსაგზაო შემთხვევა შეემთხვა, გოდერძი კუბლაშვილს პოლიტიკაში მოსვლის შესახებ სურვილი გაცხადებული არ ჰქონდა. შეკითხვაზე, რა კავშირი შეიძლება ჰქოდნეს მომხდარ ავტოსაგზაო შემთხვევას მის პოლიტიკურ მიზნებთან, გვპასუხობს: „რაჭული ფესვები მაქვს და ცოტა გვიან ვხვდები რაღაცეებს, მაგრამ რომ გავაანალიზე ეს პროცესი, მივხვდი, რომ ეს ავარია შემთხვევითი არ ყოფილა. თუ გამოიძიებენ თანამედროვე ტექნოლოგიებით, ამას დაადგენენ“.

ისვე როგორც ავარიის შესახებ, გოდერძი კუბლაშვილი დეტალებს არც მისი დაჭერის მცდელობის შესახებ აკონკრეტებს და ხაზგასმით ამბობს, რომ მხოლოდ ვახტანგ გომელაურს ენდობა.

[თამუნა უჩიძე, ახალციხე]