გოდერძი კუბლაშვილი: ‘მე დამარეგისტრირა მართლაც ვაჟკაცი კაცების პარტიამ’

გოდერძი კუბლაშვილმა, რომელიც "პატრიოტთა ალიანსიდან" პარტიაში „თამაზ მეჭიაური ერთიანი საქართველოსთვის“ გადავიდა, პირველი ბრიფინგი დღეს, 9 სექტემბერს, ახალციხის საარჩევნო მედიაცენტრში გამართა.

„დღევანდელი ბრიფინგის მიზეზი და მიზანია ჩემი კვლავ წარდგენა და უკვე საბოლოოდ დარეგისტრირება ახალი პარტიიდან. მე დამარეგისტრირა მართლაც ვაჟკაცი კაცების პარტიამ. მინდა უღრემესი მადლობა გადავუხადო ბატონ თამაზს და მადლობა შევწირო უფალს ამ წყალობისთვის. ეს არის ნომერი 7, ღვთიური ციფრი“, – განაცხადა გოდერძი კუბლაშვილმა.

მისი თქმით, იგი საარჩევნო კამპანიას და მოსახლეობასთან შეხვედრებს ორშაბათიდან დაიწყებს: „მე მზად ვარ, როგორი ენთუზიაზმითაც დავიწყე საარჩევნო კამპანია, კიდევ გაასმაგებული ენერგიით გავაგრძელო. მზად ვარ პირველივე ტურში გამარჯვებისათვის. მე მინდა ვთხოვო ჩემს კონკურენტებს, კიდევ და კიდევ, უკვე მერამდენედ, ღირსეულად და კაცურად შევერკინოთ ერთმანეთს. გავმართოთ დებატები და ბრიფინგები. ვუსურვებ ღირსეულ გამარჯვებას“.

გოდერძი კუბლაშვილმა კონკურენტებს მიმართა "ღირსეულად იბრძოლონ": „შევერკინოთ ერთმანეთს, პლუს, ერთი ოჯახი წევრები ვართ, იცით ვისაც გგულისხმობთ. ამ მარათონში მინიმუმ სამი ჩემი ოჯახის წევრი მონაწილეობს. სხვადასხვა დოზით ნათესაობა გვაკავშირებს. მე არ ვგულისხმობ ახალ კონკურენტებს, ჩემს მეგრობრებს კობა გორგოძეს და შალვა გოგოლაძეს, ნიკო ინასარიძეს საერთოდ არ ვიცნობ, არ ვგულისხმობ ბესო ხითარიშვილსაც, დანარჩენს ვგულისხმობ ყველას“.

გარდა აღნიშნულისა, გოდერძი კუბლაშვილმა დღევანდელ ბრიფინგზე განაცხადა, რომ მისი კონკურენტები ახალციხე–ადიგენის სოფლებში დადიან და ფულს არიგებენ, ასევე იყენებენ სახელისუფლებო რესურსს, თუმცა ვინ აკეთებს ამას, არ დაუსახელებია: „დღეს არ დავაკონკრეტებ. როდესაც მექნება უტყუარი მტკიცებულებები, სახელებს და გვარებს გეტყვით იმ კონკურენტების, ვინც ფულებს და ტელეფონებს არიგებს“.

შეგახსენებთ, რომ გოდერძი კუბლაშვილი 1 სექტემბრამდე "პატრიოტთა ალიანსი – გაერთიანებული ოპოზიციის“ მაჟორიტარი დეპუტატობის კანდიდატი იყო. კუბლაშვილის კანდიდატურის მოხსნაზე პარტიაში მას შემდეგ დაფიქრდნენ, რაც მან ცენტრალურ შტაბთან შეუთანხმებლად არა ერთი პრესკონფერენცია გამართა და საკუთარი გუნდის წევრებს დაუპირისპირდა. "პატრიოტთა ალიანსმა" კუბლაშვილი ნიკოლოზ ინასარიძის კანდიდატურით ჩაანაცვლა.

შეგახსენებთ, ახალციხე–ადიგენის მაჟორიტარულ ოლქში დეპუტატის მანდატისთვის 9 კანდიტატი იბრძვის.

1. გიორგი კოპაძე –„ქართული ოცნება“;
2. ვაჟა ჩიტაშვილი – „ერთიანი ნაციონალური მოძრაობა“;
3. ბესიკ ხითარიშვილი – "გაერთიანებული დემოკრატიული მოძრაობა";
4. ნუგზარ პარუნაშვილი – დამოუკიდებელი კანდიდატი;
5. კობა გორგოძე – საარჩევნო ბლოკი „პაატა ბურჭულაძე – მოძრაობა სახელმწიფო ხალხისთვის“.
6. ტარიელ ხაჩიძე - პოლიტიკური გაერთიანება „ჩვენი სამშობლო“
7. ნიკოლოზ ინასარიძე - „პატრიოტთა ალიანსი"
8. შალვა გოგოლაძე - „თავისუფალი დემოკრატები“;
9. გოდერძი კუბლაშვილი – თამაზ მეჭიაური – ერთიანი საქართველოსთვის“.

[თინათინ ზაზაძე, ახალციხე]