გოდერძი კუბლაშვილმა არჩევნები თავის უბანშიც წააგო

#6–ე გორგულის საარჩევნო უბანზე რეგისტრირებული 478 ამომრჩევლიდან, რომელშიც გოდერძი კუბლაშვილის სოფელი იმერთუბანიც შედის, კანდიდატმა მხოლოდ 36 ხმა მიიღო. 53 უბნიდან მან ხმათა ყველაზე მეტი რაოდენობა სწორედ ამ უბანზე დააგროვა.

თავად მაჟორიტარობის კანდიდატი არჩევნებზე ხმის მისაცემად არ მისულა. "რვა კაციდან არჩევანს ვერავისზე გავაკეთებდი, ამიტომ, ხარაგაულში წავედი, ახლობლის დაბადების დღეზე ვქეიფობ", – განუცხადა გოდერძი კუბლაშვილმა "სამხრეთის კარიბჭეს".

შეგახსენებთ, გოდერძი კუბლაშვილი ახალციხე–ადიგენის ოლქში, მაჟორიტარად კენჭს თავდაპირველად "პატრიოტთა ალიანსის" სახელით იყრიდა. მოგვიანებით პარტიამ მისი კანდიდატურა ნიკოლოზ ინასარიძის კანდიდატურით ჩაანაცვლა.

ამის შემდეგ, განაწყენებულმა კუბლაშვილმა პარტია დატოვა და საარჩევნო მარათონში თამაზ მეჭიაურის პარტიის სახელით ჩაერთო.

წინასაარჩევნო კამპანიის ფარგლებში გოდერძი კუბლაშვილი ბრიფინგებს თითქმის ყოველ კვირას მართავდა. სადაც აცხადებდა, რომ მისი საარჩევნო პროგრამა ღირსებაზე, ქრისტიანულ სიყვარსულსა და მიმტევებლობაზე, ასევე უკადრებლის არ კადრებზე იყო დაფუძნებული.

[თაკო ფეიქრიშვილი, ახალციხე]