საკადრო ცვლილებები ახალციხეში

დღეს, 9 აგვისტოს, ახალციხეში რამდენიმე საკადრო ცვლილება განხორციელდა. ახალციხის ვიცე მერი ზაზა თამარაშვილი, ახალციხის ციხის დირექტორად დაინიშნა, ამის გამო, მან ვიცე მერის პოზიცია დატოვა.

ვიცე მერის პოსტი ვაკანტური დიდხანს არ დარჩენილა. ამ თანამდებობაზე ახალციხის მერმა გიორგი კოპაძემ თვითმმართველი თემის, ახალციხის მუნიციპალიტეტის გამგეობის ადმინისტრაციის უფროსი, ილია ზარდიაშვილი დანიშნა.

ზაზა თამარაშვილიც და ილია ზარდიაშვილიც მოვალეობის შესრულებას დღეიდან, 9 აგვისტოდან შეუდგნენ. ორივე მათგანის დანიშვნის ბრძანება დღეს დაინიშნა.

დღესვე, გადადგომის შესახებ დაწერა განცხადება ახალციხის მერმა გიორგი კოპაძემ, რომელიც „ქართული ოცნების“ მაჟორიტარობის კანდიდატია ახალციხე–ადიგენის საარჩევნო ოლქში.

კოპაძის განცხადებაზე საკრებულომ ხვალ, 10 აგვისტოს უნდა იმსჯელოს. იმ შემთხვევაში თუ საკრებულო განცხადებას დააკამაყოფილებს, ახალციხის მერის მოვალეობის შესრულება ვიცე–მერს ილია ზარდიაშვილს დაეკისრება.

ამ ეტაპზე ვაკანტური ახალციხის მუნიციპალიტეტის გამგეობაში ადმინისტრაციის უფროსის პოზიცია რჩება. „სამხრეთის კარიჭეს“ წყაროს ინფორმაციით, ამ ადგილზე გამგეობის იურიდიული სამსახურის უფროსი ბაია იველაშვილი მოიაზრება.

[sknews.ge]