გიორგი კოპაძემ ახალციხის მერია დატოვა

ქალაქის საკრებულოს რიგგარეშე სხდომა 17:00 საათზე დაიწყო. ახალციხის მერის თანამდებობიდან გადადგომის შესახებ დეპუტატებს საკრებულოს თავმჯდომარემ დავით ლომიძემ აცნობა. მანვე დეპუტატებს მერის მოვალეობის შემსრულებელი ილია ზარდიაშვილი წარუდგინა.

დავით ლომიძემ გიორგი კოპაძის ორწილიანი მუშაობაც შეაჯამა და ასევე ამჟამად მიმდინარე ინფრასტრუქტურული პროექტების შესახებაც ისაუბრა: „ნდობას თუ გამოვუცხადებთ გიორგი კოპაძეს [არჩევნებში], კიდევ ბევრი საკითხის გადაჭრაში დაგვეხმარება“.

ყოფილ მერს არჩევნებში წარმატება უსურვეს საკრებულოს დეპუტატებმაც.

„გიორგი კოპაძე ერთ-ერთი ყველაზე წარმატებული მერია სხვა მერებს შორის. ჩვენ ერთი გუნდი ვართ და მომავალშიც ასე გავაგრძელებთ მუშაობას“, – განაცხადა ფრაქცია „ქართული ოცნების“ თავმჯდომარემ მამუკა მიქელაძემ.

ყოფილი მერი 8 ოქტომბრის არჩევნებზე გამარჯვებაში დარწმუნებულია.

„იმედი მაქვს, რომ წარმატებული იქნება ჩემი ბრძოლა დეპუტატობის კანდიდატად. რა თქმა უნდა პასუხისმგებლობა უფრო მეტი დამემატება, თუმცა თქვენს გვერდით ყოველთვის ვიქნები“, - განაცხადა გიორგი კოპაძემ.

დეპუტატებმა წარმატებები უსურვეს მერის მოვალეობის შემსრულებელს ილია ზარდიაშვილსაც და მას გვერდში დგომას დაპირდნენ.

„თქვენი იდეები და ჩემი ენერგია ქალაქის კეთილდღეობისთვის“, - განაცხადა სხდომაზე ზარდიაშვილმა.

ზარდიაშვილის შესახებ ისაუბრა ქალაქის ყოფილმა მერმაც. კოპაძე ახალი ვიცე-მერის შესაძლებლობებში დარწმუნებულია: „პირადად ჩემი ინიციატივა იყო, რომ ილია ვიცე-მერი გამხდარიყო, ჩემს შტაბს ხელმძღვანელობდა და კარგად ვიცი მისი შესაძლებლობები“.

შეგახსენებთ, რომ 7 აგვისტოს „ქართულმა ოცნებამ“ მაჟორიტარი დეპუტატობის კანდიდატად ადიგენი-ახალციხის ოლქში, ქალაქის მერი გიორგი კოპაძე დაასახელა.

[ლუბა გიორგაძე, ახალციხე]