2000 განმცხადებელი რეაგირების მოლოდინში

გასულ წლის 18 ივლისს სტიქიის შედეგად დაზარალებული მოსახლეობის ნაწილს დახმარება დღემდე არ მიუღია. ახალციხის მუნიციპალიტეტის გამგეობაში დაახლოებით 2000-მდე განცხადებაა შესული.

ახალციხის მუნიციპალიტეტის გამგებლის მოვალეობის შემსრულებელი ბესიკ ხითარიშვილი განმარტავს, რომ ტერიტორიული ორგანოების ახალ რწმუნებულებს არსებული ვითარების შესწავლა დაევალათ.

”ყველა განცხადება, რომელიც უპასუხოდ იყო დარჩენილი, რწმუნებულებს გადავეცით. თითოეული რწმუნებული ვალდებულია, რომ ადგილზე მივიდეს და შეისწავლოს რა მდგომარეობაა”, - განმარტავს ხითარიშვილი.

მისივე თქმით, მხოლოდ ამის შემდეგ მოხდება შესაბამისი ხარჯთაღრიცხვის მომზადება და თანხის მოძიება.

”თანხის ნაწილი ალბათ ადგილობრივი ბიუჯეტიდან გამოიყოფა, ასევე შეიძლება დაგვეხმარონ არასამთავრობო ორგანიზაციები, ან ფულის გამოყოფა სხვადასხვა ფონდებიდან მოხდეს ”, - ამბობს იგი.

[თამარ თოთაძე, ახალციხე]