სტიქიამ მოსავლის 80 პროცენტი გაანადგურა

ძლიერი ქარი, წვიმა და სეტყვა გუშინ ღამით, 12 საათზე დაიწყო და თითქმის ნახევარი საათის განმავლობაში გრძელდებოდა.

ადგილობრივები ამბობენ, რომ ასეთი მასშტაბის სეტყვა არ ახსოვთ.

- ”კვერცხისა და კაკლისხელა სეტყვები ცვიოდა, კუთხიანი, მინებს როგორც კი ხვდებოდა, ამსხვრევდა. ხეხილს და ნათესებს რაღას უზამდა”, - ამბობს ახალციხეში ჭყონდიდელის ქუჩაზე მცხოვრები ვენერა ივანიძე.

სეტყვის შედეგად დაზიანდა არამხოლოდ ხეხილი და ნათესები, არამედ სახლების სახურავები და მანქანები.

ახალციხის მუნიციპალიტეტის გამგებლის გელა დემეტრაძის განმარტებით, 5 სოფელში საშუალო სიმძიმის ზარალია, განსაკუთრებით მძიმე მდგომარეობაა დანარჩენ 13 სოფელში.

- ”პირველ ეტაპზე იმ სახლების აღწერა მიმდინარეობს, რომელთაც სახურავები დაუზიანდათ და სასწრაფოდ ესაჭიროება აღდგენა. შემდეგ ნათესების მდგომარეობას შევისწავლით. ზარალის შემსწავლელი კომისია უკვე მუშაობს”, - ამბობს იგი.

ახალციხის მცხოვრებლები ამბობენ, რომ მოსავლის 80 პროცენტი განადგურებულია.

- ”მთლიანად მიწასთან გასწორდა ბოსტნეული კულტურები და კარტოფილი, აღარ გამოდგება. სიმინდი თუ გადარჩა, მაგრამ ეგეც მხოლოდ ღეროები დატოვა. ვენახი და ხეხილი სულ ძირს ჩამოიტანა”, - ამბობს ახალციხეში ახპინძის ქუჩაზე მცხოვრები ვახტანგ სუდაძე.

სტიქიამ განსაკუთრებით დააზიანა ქალაქი ვალე. ვალის რწმუნებულის გელა გოზალიშვილის თქმით, მთლიანად განადგურებულია ნათესები და დაზიანდა თითქმის ყველა ის სახლი, რომელსაც ”აზბესტის” სახურავი აქვს.

- ”ამ წუთებში დავდივართ კარდაკარ და შედეგებს ვათვალიერებთ. რა ოდენობის ზარალია წინასწარ თქმა ძნელია”, - ამბობს იგი.

სტიქიის გამო წუხელ ელექტროენერგიის მიწოდება შეუწყდა ახალციხის მუნიციპალიტეტის სოფლებს. თუმცა, როგორც ”ენერგო-პრო ჯორჯიას” ახალციხის სერვის-ცენტრის მენეჯერი ზურაბ მამუკაშვილი ამბობს, ამ ეტაპზე ელექტროენერგიის მიწოდება აღდგენილია: ”ავარიულად გამოირთო სოფლები, მაგრამ უკვე ყველა დაზიანება აღდგენილია და ელექტროენერგია ყველა სოფელს მიეწოდება”.

ასეთი ძლიერი სეტყვა ამ ზაფხულს ახალციხეში მეორედ მოვიდა. ადგილობრივებს ნათესების გამოცოცხლების იმედი აღარ აქვთ და ღარიბ შემოდგომას პროგნოზირებენ.

სეტყვის გროვები ქალაქში ამ დრომდე რჩება. ამ წუთებში დასუფთავების სამსახურის წარმომადგენლები ქალაქის ქუჩებს სტიქიის ნარჩენებისგან ასუფთავებენ.

(რამდენიმე წუთში ”სამხრეთის კარიბჭე” სტიქიის მასშტაბების ამსახველ ფოტორეპორტაჟს შემოგთავაზებთ)

[ნინო ნარიმანიშვილი, ახალციხე]