გამგებლის მოვალეობის შემსრულებლად ბესიკ ხითარიშვილი დაინიშნა

საკრებულოს დეპუტატებმა ხითარიშვილი ფარული კენჭისყრით აირჩიეს. საკრებულოს 26 დეპუტატიდან, სხდომას 24 ესწრებოდა. ამათგან, დეპუტატიდან ხითარიშვილის კანდიდატურას მხარი 16-მა დაუჭირა.

ახალციხის მუნიციპალიტეტის საკრებულოს თავმჯდომარის ოლეგ სანდროშვილის განმარტებით, კენჭისყრის ფარულად ჩატარება, ხითარიშვილის ირგვლივ ბოლო პერიოდში პრესაში გავრცელებული სტატიების გამო გადაწყდა. შეგახსენებთ, რომ დღეს დილით გავრცელდა ინფორმაცია, რომ ახალციხის მუნიციპალიტეტის საკრებულოს თავმჯდომარეს ოლეგ სანდროშვილს მუნიციპალიტეტის გამგებლად ბესიკ ხითარიშვილის დანიშვნას აიძულებდნენ.

”შეიძლება მერე ითქვას, რომ ზეწოლას ჰქონდა ადგილი. ამიტომ ჩავატარეთ ფარული კენჭისყრა. 16 ხმით, რვის წინააღმდეგ, დადებითად გადაწყდა ბესიკ ხითარიშვილის კანდიდატურის მოვალეობის შემსრულებლად დანიშვნა”, - განმარტავს ოლეგ სანდროშვილი.

ხითარიშვილი გამგებლის მოავლეობის შემსრულებლად სამთვიანი ვადით დაინიშნა. შეგახსენებთ, რომ ახალციხის მუნიციპალიტეტის გამგებლის ვაკანსიაზე 11 განცხადება იყო შესული.

ხმაურიანი სხდომის შესახებ ”სამხრეთის კარიბჭე” ვრცელ ინფორმაციას ნახევარ საათში შემოგთავაზებთ.



[თამარ თოთაძე, ახალციხე]