2012 წელს სტიქიით მიყენებულ ზარალს ხელახლა შეისწავლიან

ახალციხის მუნიციპალიტეტის გამგებლის მოვალეობის შემსრულებლის ბესიკ ხითარიშვილის განმარტებით, მიმდინარე წლის 18 ივლისს სტიქიით დაზარალებული მოსახლეობა დღემდე დახმარების გარეშეა დარჩენილი. მისი თქმით, გამგეობაში 2 000-მდე ხელმოწერაა შესული, რაც ამ დრომდე დაკმაყოფილებული არ არის.

”ჯერ ეს განცხადებები უნდა განვიხილოთ. ეს იყო სახელმწიფო პროგრამა, რომელიც გუბერნიის ხაზით კეთდებოდა და უკვე დამთავრებულია. ამიტომ, ჩვენ უნდა განვიხილოთ და მოვიძიოთ რესურსები, რადენად ეფექტურად დაეხმარნენ ამ მოსახელობას. არსებობს გარკვეული რესურსი, რასაც თითოეულ დაზარალებულზე გადავანაწილებთ”, - განმარტავს ბესიკ ხითარიშვილი.

სავარაუდოდ, მომავალი წლიდან ახალი კომისია შეიქმნება, რომელიც აღნიშნული განცხადებებს შეისწავლის. როგორც ხითარიშვილი ამბობს, ”უფრო გულიანად მიუდგება ამ საქმეს და არცერთ განცხადებას უყურადღებოდ არ დატოვებს”.

კონკრეტულად საიდან იქნება გამოყოფილი თანხა 2012 წელს სტიქიით დაზარალებული მოსახლეობისათვის ბესიკ ხითარიშვილი ვერ აკონკრეტებს.

”თუ რაიმე ნაშთი დაგვრჩება მიმდინარე წლის ბიუჯეტში, იქიდან გამომდინარე უნდა ვიმსჯელოთ. გარდა ამისა, ცენტრალური ბიუჯეტიდან არ მოსულა მიზნობრივი ტრანსფერები, როგორც კი ეს თანხა გვექნება, უკვე ადვილი იქნება გადაწყვეტილების მიღება”, - ამბობს გამგებლის მოვალეობის შემსრულებელი.

[თამარ თოთაძე, ახალციხე]