‘პატრიოტთა ალიანსმა’ ახალციხეში საარჩევნო შტაბი გახსნა

„პატრიოტთა ალიანსის“ ახალციხის შტაბის ხელმძღვანელი ამბობს, რომ პარტიას ცოტა ხნის წინ შეუერთდა, ამიტომ შტაბი ამ დროისათვის აქტიურად არ მუშაობს.

"მომწონდა ამ პარტიის ჩართულობები. გავიცანი გოდერძი კუბლაშვილი [კანდიდატი ახალციხე–ადიგენის ოლქში], ვილაპარაკეთ, იყო შემოთავაზება ამ ადგილზე, ახალციხელი ვარ და გადავწყვიტე, რომ მათ გვერდზე დავმდგარიყავი“, – ამბობს მერაბ ქიმერიძე.

„პატრიოტთა ალიანსს“ შტაბი ადიგენშიც აქვს. ადიგენის შტაბის ხელმძღვანელი ლევან ბერიძე ამბობს, რომ "პატრიოტთა ალიანსს“ ორი თვის წინ შეუერთდა, იქამდე "ქართული ოცნების“ აქტივისტი იყო.

„ვიყავი „ქართული ოცნების” მობილური ჯგუფის უფროსი, მაგრამ „ოცნებამ“ პატიოსანი და ძლიერი ადამიანები გვერდზე გასწია და „ნაციონალური მოძრაობის“ მხარდამჭერები "ქართული ოცნების“ რიგებს შეუერთა“, – ამბობს ლევან ბერიძე.

მისი თქმით, შტაბში 18 კოორდინატორი, ამდენივე აქტივისტი და ახალგაზრდული ჯგუფის 14 წევრია. აქტივისტები მოსახლეობაში აქტიურად მუშაობენ: "სოფლებში დავდივართ, მოსახლეობას ვხვდებით. ახლა ზაფხულის პერიოდია, ხალხი მთაშია და ჩვენ იქაც ვახერხებთ ასვლას, გაზეთებისა და ბუკლეტების დარიგებას. ასევე ვავსებთ სპეციალურ ბლანკებს ჩვენი ამომრჩევლებისთვის“.

ახალციხეში, „პატრიოტთა ალიანსს“, დაახლოებით ექვსი თვის განმავლობაში, აქტივისტთა სხვა გუნდი ჰყავდა. ამ დროისთვის კი შტაბმა, როგორც შემადგენლობა, ასევე ადგილ–მდებარეობაც გამოიცვალა.



„ადიგენის შტაბი კარგად მუშაობს, ამიტომ არ ვაპირებ შეცვლას, ახალციხის შტაბი კი შეიცვალა. ჩემი გადაწყვეტილებით, მის ხელმძღვანელად მერაბ ქიმერიძე დავასახელე. ეს იყო ჩემი გადაწყვეტილება ცენტრალურ პარტიასთან შეთანხმებით. ძველი შტაბის წევრებს ჩვენგან აქვთ შეთავაზება, მათთვის კარები ღიაა“, – განმარტავს გოდერძი კუბლაშვილი, პარტიის მაჟორიტარობის კანდიდატი ახალციხე–ადიგენის საარჩევნო ოლქში. იგი პარტიამ ოფიციალურად დღეს წარადგინა.

„ადიგენში კარგად მიცნობენ, 51 წელია იქ ვცხოვრობ. რაც შეეხება ახალციხეს, მასმედიის მეშვეობით საკმაოდ კარგად გამიცნო მთელმა საქართველომ, დაწყებული იმ თემიდან, რომელიც მინარეთს ეხებოდა და იმის შემდეგაც, ადიგენის პრობლემებით,“ –ამბობს კუბლაშვილი.

[თაკო ფეიქრიშვილი, ახალციხე]