ზურა ხაჩიძე ბორჯომსა და ასპინძაში „პატრიოტთა ალიანსის“ დეპუტატობის კანდიდატია

შოუ ბიზნესის წარმომადგენელი ზურა ხაჩიძე ამომრჩეველთა გულის მოგებას ბორჯომში, ასპინძასა და ახალქალაქის ხუთ სოფელში ეცდება.
მისი წარდგენა დღეს, 29 ივლისს „პატრიოტთა ალიანსის“ ლიდერების მიერ ქუთაისში, ოპერის თეატრის წინ, ქუთაისისა და ოზურგეთის მაჟორიტარობის კანდიდატებთან ერთად მოხდა.

როგორც „სამხრეთის კარიბჭესთან“ ალიანსის პოლიტიკური მდივანი და საარჩევნო შტაბის ხელმძღვანელი გოჩა თევდორაძე აცხადებს, ზურა ხაჩიძე წინასაარჩევნო კამპანიის დაწყებას უახლოეს დღეებში დაიწყებს.

„ზურა, ჩვენი პარტიის აქტიური მხარდამჭერია. ვფიქრობ, რომ თავის საარჩევნო ოლქში დიდი რეიტინგი ექნება“, – განაცხდა თევდორაძემ „სამხრეთს კარიბჭესთან“.

"პატრიოტთა ალიანსს", ჯერ საარჩევნო პროგრამა საზოგადოებისთვის არ წარუდგენია.

პარტიის წარმომადგენლები სამცხე-ჯავახეთში ვიზიტსა და ამომრჩევლებისთვის საარჩვენო პროგრამის წარდგენას, ასევე, დანარჩენილ ორ ოლქში დეპუტატებობის კანდიდატების დასახელელბას უახლოეს დღეებში გეგმავენ.

ვინ იქნებიან "ალიანსის" დეპუტატობის კანდიდატები ნინოწმინდა-ახალქალაქისა და ახალციხე-ადიგენის ოლქებში , პარტიის პოლიტიკური მდივანი ჯერ არ ასახელებს: "საკითხი განიხილება, არ მინდა მოვლენებს წინ გავუსწრო“.

მიუხედავად „პატრიოტთა ალიანსის“ პოლიტიკური მდივნის ამ განცხადებისა, არასამთავრობო ორგანიზაცია „საზოგადოებრივი დარბაზის“ ხელმძღვანელი გოდერძი კუბლაშვილი ირწმუნება, რომ ალიანსმა გადაწყვეტილება უკვე მიიღო და ახალციხე-ადიგენის საარჩევნო ოლქში დეპუტატობის კანდიდატი სწორედ ის იქნება.

„პატრიოტთა ალიანსის“ გარდა სამცხე-ჯავახეთში, მაჟორიტარი დეპუტატობის კანდიდატები ჯერ მხოლოდ „ნაციონალურ მოძრაობას“ ჰყავს წარდგენილი.

შეგახსენებთ, რომ თუ ამ დრომდე სამცხე–ჯავახეთს პარლამენტში 6 მაჟორიტარი დეპუტატი ჰყავდა, ახალი საარჩევნო საზღვრების მიხედვით, მომავალი მოწვევის პარლამენტში რეგიონს სამი დეპუტატი წარადგენს. ახალციხე–ადიგენი ერთ საარჩევნო ოლქად გაერთიანდა; ასპინძა – ბორჯომი და ახალქალაქის 5 სოფელი (აზავრეთი, კოჭიო, პტენა, ბარალეთი და ჩუნჩხა) ასევე ერთ დეპუტატს აირჩევს და ერთი დეპუტატი ეყოლება ახალქალაქის დანარჩენ სოფლებსა და ნინოწმინდასაც.

[ლუბა გიორგაძე, ახალციხე]