გოდერძი კუბლაშვილი: ვერავის მივცემდი ხმას და ხარაგაულში საქეიფოდ წავედი

"რვა კაციდან არჩევანს ვერავისზე გავაკეთებდი, ამიტომ, ხარაგაულში წავედი, ახლობლის დაბადების დღეზე ვქეიფობ", – განუცხადა გოდერძი კუბლაშვილმა "სამხრეთის კარიბჭეს".

შეგახსენებთ, გოდერძი კუბლაშვილი ახალციხე–ადიგენის ოლქში, მაჟორიტარად კენჭს თავდაპირველად "პატრიოტთა ალიანსის" სახელით იყრიდა. მოგვიანებით პარტიამ მისი კანდიდატურა ნიკოლოზ ინასარიძის კანდიდატურით ჩაანაცვლა.

ამის შემდეგ, განაწყენებულმა კუბლაშვილმა პარტია დატოვა და საარჩევნო მარათონში თამაზ მეჭიაურის პარტიის სახელით ჩაერთო.

კუბლაშვილი ადიგენში, სოფელ იმერთუბანში ცხოვრობს. იგი მთელი წინასაარჩევნო პერიოდის განმავლობაში ამბობდა, რომ მისი სოფლიდან ვერცერთი კანდიდატი ვერ მიიღებს ხმებს. თუმცა, დღეს თავის სოფელში თავადაც არ იმყოფება.

ახალციხე–ადიგენის ოლქში, მაჟორიტარობის ცხრა კანდიდატია. ამათგან ერთი, მმართველი გუნდის კანდიდატი გიორგი კოპაძე, კუბლაშვილის ქვისლია.

[sknews.ge]