ახალციხე–ადიგენის დეპუტატობას 'პატრიოტთა ალიანსიდან' გოდერძი კუბლაშვილი ეცდება

„პატრიოტთა ალიანსი“ იმიტომ გადავწყვიტე, რომ სუფთა, გაუსვრელი ძაალააა. როგორც მიცნობთ, მეც გაუსვრელი ვარ, ჩემ წარსულში ლაქებს ვერავინ იპოვის“, – ამბობს კუბლაშვილი.

იგი ჯერ ოფიციალურად არ წარუდგენიათ და არც საარჩევნო კამპანია დაუწყია. ამბობს, რომ ჯერ ადიგენის საგანმანათლებლო რესურსცენტრი უნდა დატოვოს.

„როგორც საკუთარ თავს და შვილებს დავუდგები გვერდში, ისე მივყვები ბოლომდე ხალხის პრობლემებს. თუ ამას არ გავაკეთებ, სამ თვეში დავწერ განცხადებას და პარლამენტიდან წამოვალ“, – ამბობს კუბლაშვილი და ამატებს, რომ სამ თვეში პარლამენტის დატოვების შესახებ მოსახლეობისთვის უფრო მეტად სარწმუნო რომ გახდეს, ამის შესახებ ხალხთან ხელშეკრულებას ნოტარიულად გააფორმებს.

რაც შეეხება ქვეყნის საგარეო კურსს აცხადებს, რომ დასავლური ლიბერალიზმი მისთვის მიუღებელია. შეკითხვაზე, უფრო კონკრეტულად რას ფიქრობს ქვეყნის საგარეო კურსთან დაკავშირებით, კუბლაშვილი გვპასუხობს: „სამყარო უფალმა შექმნა და მას აქვს ოთხი მხარე, აღმოსავლეთი, დასავლეთი, ჩრდილოეთი და სამხრეთი. ასევე, უფალმა შექმნა ადამიანი, მას მისცა თვალები და გონება და უთხრა, რომ გაიხედე იქით, საითაც ჩათვლი, რომ შენთვის და შენი ქვეყნისთვის უკეთესიაო“.

გოდერძი კუბლაშვილი ადიგენში ჭელას მინარეთის გამო განვითარებული მოვლენების დროს, ქრისტიანების აქციის ერთ–ერთი ორგანიზატორი იყო. მაშინ იგი გიორგი კოპაძესთან ერთად, რომელიც ამჟამად ახალციხის არჩეული მერია, მუსლიმების წინააღმდეგ გამოდიოდა და ჭელაში მოჭრილი მინარეთის დაბრუნებას აპროტესტებდა.

შეკითხვაზე, რამდენად აქვს, ადიგენში მუსლიმი თემის მხარდაჭერის იმედი, გვპასუხობს: „გამოცდილება შევიძინე ამ მიმართულებით და ეს რომ დაგეგმილი ოპერაცია იყო, გვიან მივხვდი. ეკლესია და მეც ჩაგვაგდეს ისეთ მდგომარეობაში, რომ რისკის ქვეშ დაგვაყენეს. მუსლიმებმა დაინახეს, რომ მე მათი მტერი კი არ ვარ, იმის მტერი ვარ, ვინც ისინი ასეთ ვითარბაში ჩააგდო და ქვეყნის საწინააღმდეგო ქმედება გააკეთებინა“.

კუბლაშვილი დარწმუნებულია, მუსლიმ თემში ხმების 80 პროცენტს აიღებს: „რაც შეეხება იმას, თუ ვინ მოაწყო ჭელის ამბები, ამას პარლამენტის ტრიბუნიდან ვიტყვი“.

„პატრიოტთა ალიანსის“ მაჟორიტარი დეპუტატობის კანდიდატი დარწმუნებულია, რომ პარლამენტში აუცილებალდ მოხვდება: „ნაც–ქოცებს მე გოდერძი კუბლაშვილი აუცილებად დავამარცხებ და დავამსხვრევ მითს, რომ ახალციხე–ადიგენი მერაბიშვილის და მესხელის არის“.

[თამუნა უჩიძე, ახალციხე]