მუსლიმები საწინააღმდეგო აქციების ორგანიზატორი მაჟორიტარობის კანდიდატის რანგში დღეს მუსლიმებს ხვდება

2013 წელს ჭელაში მინარეთის დადგმის საწინააღმდეგო აქციის ერთერი ორგანიზატორმა, ახალციხე–ადიგენის მაჟორიტარი დეპუტატობის კანდიდატმა გოდერძი კუბლაშვილმა, ჭელაში მცხოვრებ მოსახლეობასთან შეხვედრა ფეისბუქის გვერდზე დაანონსა.როგორც მან განაცხადა ადგილობრივებთან სამ საკითხზე ისაუბრებს. არცერთი მის წინასაარჩევნო კამპანიას არ ეხება.

„დღეს ს.ჭელაში ცნობილ " მინარეთთან" ვგეგმავ შეხვედრას მუსლიმ მრევლთან...სასაუბრო თემა: 1.იციან თუ არა,რომ ხიდზე რომელზეც 17 წელია დადიან ჩემი ნაჩუქარია 2.იციან თუ არა,რომ მოხეში სადაო შენობასთან დაკავშირებული საკითხის მოგვარებაში მცირეოდენი წვლილი მეც შევიტანე. 3. სამარცხვინო თემა,რომელიც მიცვალებულების არ დამარხვას ეხებოდა.მქონდა პროტესტი“, – ნათქვამია მის განცხადებაში.
გოდერძი კუბლაშვილს ახალციხე–ადიგენის საარჩევნო ოლქში მოსახლეობასთან, როგორც მაჟორიტარი დეპუტატობის კანდიდატს, შეხვედრები არ ქონია.

მისი საარჩევნო კამპანია ახალციხეში საარჩევნო მედიაცენტრში გამართული ბრიფინგებით შემოიფარგლება, რომლსაც ყოველკვირეულად მართავს. ამბობს, რომ მოსახლეობასთან შესახვედრად ფინანსები არ აქვს, არც მისი პლაკატებია გამოკრული. მოსახლეობასთან კომუნიკაციას კი მედიაცენტრის საშუალებით ახერხებს.

ამომრჩევლებთან შეხვედრას არჩევნებამდე ორი დღით ადრე აპირებს.

„6 ოქტომბერს 13:00 საათზე ახალციხეში მესხეთის სახელმწიფო თეატრში ვგეგმავ ამომრჩევლებთან შეხვედრას, მეორე დღეს 7 ოქტომბერს კი ადიგენის ახალგაზრდულ ცენტრში“, – ამბობს „თამაზ მეჭიაური – ერთიანი საქართველოსთვის“ მაჟორიტარი დეპუტატობის კანდიდატი გოდერძი კუბლაშვილი.

შეგახსენებთ, რომ გოდერძი კუბლაშვილი 1 სექტემბრამდე „პატრიოტთა ალიანსის“ მაჟორიტარი დეპუტატობის კანდიდატი იყო.კუბლაშვილის კანდიდატურის მოხსნაზე პარტიაში მას შემდეგ დაფიქრდნენ, რაც მან ცენტრალურ შტაბთან შეუთანხმებლად არა ერთი პრესკონფერენცია გამართა და საკუთარი გუნდის წევრებს დაუპირისპირდა.

ახალციხე–ადიგენის საარჩევნო ოლქში ცხრა მაჟორიტარი დეპუტატობის კანდიდატია.

[თინათინ ზაზაძე, ადიგენი]