ადიგენში, მდინარეზე მოშლილ გაბიონს ჯერ ვერ აკეთებენ

ადიგენის მუნიციპალიტეტის გამგეობაში აცხადებენ, რომ კომპანია „ლოდი +“ მზადაა დაზიანებული ადგილები ხელახლა გააკეთოს, თუმცა ამის საშუალებას ადიდებული მდინარე არ იძლევა.

„ხშირი წვიმები იყო, ამიტომ წყლის დონემ აიწია, როგორც კი დაიწევს, მუშაობას დაიწყებენ“, – ამბობს ადიგენის მუნიციპალიტეტის გამგეობის საზოგადოებასთან ურთიერთობის სამსახურის წარმომადგენელი მამუკა კალანდაძე.

წყლის დონის კლებას რომ ელოდებიან, ამის შესახებ „სამხრეთის კარიბჭეს“ „ლოდი + შიც“ განუცხადეს: „თანამშრომლები მანდ არიან. წყალი დაიკლებს და გააკეთებენ“.

რაც შეეხება წყლის მიერ წაღებული მიწაყრილის ნაწილს, ამ მიმართულებით სამუშაოების განხორციელება არ იგეგმება.

„ჩვენ მდინარე კალაპოტში დავაბრუნეთ და ამის შემდეგ წყალს კალაპოტი აღარ შეუცვლია, მანდ პრობლემა გაბიონებია. გაბიონი ჩამოიშალა და წყალმა წაიღო“, – ამბობს შპს „ახალი კონსტრუქციის“დირექტორი კახა ბერიძე, რომელმაც მდინარე ქვაბლიანზე მიწაყრილი გააკეთა.

შეგახსენებთ, ადიგენში, სოფელ უდეში, მდინარე ქვაბლიანზე 99 000 ლარად ახალი მოწყობილი გაბიონი და გამაგრებული ნაპირის ნაწილი წყალმა წაიღო. მოსახლეობას ნაკვეთების დატბორვის ეშინია.

[თამუნა უჩიძე, ახალციხე]