არალში სარწყავი მილების საქმის შესასწავლად წყლის დონის დაწევას ელოდებიან

ადიგენის მუნიციპალიტეტის მერიის ინფრასტრუქტურის სამსახურში ამბობენ, რომ არალში დაზიანებული წყლის მილების საკითხთან დაკავშირებით, ვითარებაში გასარკვევად, სოფელში უკვე იყვნენ, თუმცა, სისტემა მთლიანად წყლით არის დაფარული, ამიტომ ამ ეტაპზე, რაიმე სახის სამუშაოების განხორციელება შეუძლებელია.

„ათამდე ადგილობრივთან ერთად ვიყავით იმ ადგილზე, სადაც ეს მილებია დაზიანებული, მაგრამ ვერაფერი გავაკეთეთ, რადგან წყალში ინსტრუმენტების შეტანაა საჭირო. ახლა იქ ვერავინ შევა, წყლის სიმაღლე ორ მეტრზე მეტია“, – ამბობს ადიგენის მუნიციპალიტეტის მერიის ინფრასტრუქტურის სამსახურის უფროსი გოდერძი სხირტლაძე და ამატებს, რომ მას შემდეგ რაც წყლის დონე დაიწევს ვითარებას შეისწავლიან – „ამის შემდეგ გავიგებთ რისი გაკეთებაა შესაძლებელი და რისი არა“.

შეგახსენებთ, რომ არალში წყლის დაზიანებული მილების შეკეთების თხოვნით, ადიგენის ადგილობრივ თვითმმართველობას ადგილობრივებმა წერილობით მიმართეს.

სოფელში, „ ყორუღების“ ტერიტორიაზე 150–მეტრიანი სარწყავი სისტემა „ბი–პის“ დაფინანსებით 2008 წელს, 18 000 ლარად გაკეთდა. არალში მცხოვრებლები ამბობენ, რომ მილი მწყობრიდან სამი წლის წინ, წყალდიდობის გამო გამოვიდა. მილები ამ დრომდე მდინარე ქვაბლიანში ყრია.

[თაკო ფეიქრიშვილი, ადიგენი]